Վազգենն անփոխարինելի է. Շարմազանով

ԱԺ փոխխոսնակ Էդուարդ Շարմազանովը չի ցանկանում իրավական գնահատական տալ հարցին, թե ինչու չբացահայտվեցին հոկտեմբերի 27-ի դեպքերը, սակայն քաղաքական տեսանկյունից դիտարկելով՝ գտնում է, որ այդ ոճրագործությունը Հայաստանի անկախ պետականության դեմ ուղղված քայլ էր, որը խոր հետք թողեց Հայաստանի պատմության մեջ:

«Հայաստանի նորագույն պատմության մեջ դա ամենամեծ ոճիրն էր ու ամենացավալի էջը. ահաբեկչություն, որին զոհ գնացին Հայաստան պետության երևելի դեմքեր՝ Սպարապետ Վազգեն Սարգսյանի և ՀՀ ԱԺ այն ժամանակվա նախագահ Կարեն Դեմիրճյանի գլխավորությամբ: Մեզ համար դա ցավ էր, որոհետև մենք կորցրեցինք մեր կուսակցության առաջնորդին: Հանցագործները՝ գոնե իրականացնողները, ձերբակալված են, սակայն մնացած մասով չեմ կարող գնահատական տալ, որովհետև իրավիճակին չեմ տիրապետում, ամբողջական ինֆորմացիա չունեմ: Փաստն այն է, որ ոճրագործներն այսօր գտնվում են ազատազրկման վայրում»,- ասաց նա:

Պատգամավորի խոսքով՝ այդ դեպքերը շատ ծանր հետևանքներ թողեցին Հայաստան պետության համար: Նրա համոզմամբ՝ եթե Վազգեն Սարգսյանն ու Կարեն Դեմիրճյանն այսօր ողջ լինեին, Հայաստանը մի քանի քայլ առաջ կլիներ: «Ես դեմ եմ, որ ասում են՝ անփոխարինելի մարդիկ չկան, անհատները դեր չեն խաղում: Դա սովետական մտածողություն է: Անփոխարինելի մարդիկ կան, և Սպարապետն ինձ համար կոնկրետ՝ անփոխարինելի է, նույնը՝ Կարեն Սերոբիչը, ով ազգի անփոխարինելին էր: Եթե անփոխարինելի չեն, թող Վազգենի տեղն ուրիշ լիներ: Նա էր, որ ձեռքը խփում էր սեղանին ու ասում՝ հինգ հարյուր մարդ է պետք… Ես նրան անձնապես չեմ ճանաչել, բախտս չի ժպտացել, որ նրան տեսնեմ, բայց նրա շողքն ընկած է մեր սերնդի վրա, ես այդ ոգով մեծացել եմ: Մեր գործը պետք է լինի այն, որ հնարավորինս քայլ կատարենք ու ծանր ու թեթև անելով, նրանց երազանքները մոտեցնենք Հայաստանին: Կստացվի, թե ոչ, ժամանակը ցույց կտա»,- ասաց պատգամավորը:

Շարմազանովը ցավով է ընդգծում, որ այդ ահաբեկչությունից նույնիսկ տասնյոթ տարի անց, Երևանում գրեթե նմանատիպ դեպք կրկնվեց ամռանը՝ հուլիսին, երբ Սասնա Ծռերի անդամները գրավեցին ՊՊԾ գունդը, որտեղ, ինչպես ինքն է ասում՝ հայը հայի վրա որոշեց ձեռք բարձրացնել: «Կարծում եմ՝ հոկտեմբերյան ահաբեկչությունից մեր քաղած գլխավոր դասը դա պետք է լիներ, բայց, փաստորեն, մենք այն ևս լավ չէինք սերտել: Կարեն Սերոբիչի վերջին խոսքը եղել է այն, որ զենքով հարցեր չեն լուծում: Այո, ես համամիտ եմ, որովհետև, որքան էլ որ դժվար լինի, որքան էլ որ խնդիրներ լինեն, մեկս մյուսի հետ լեզու չգտնենք, հայը հայի վրա չպետք է զենք բարձրացնի: Մենք պետք է կարողնանք ընդհանուր լեզու գտնել և բոլոր հարցերը քննարկենք միևնույն սեղանի շուրջ: Իսկ այն, որ ահաբեկչությունը ախտ է, որը վնասում է մեր պետության զարգացմանը, որը նաև մեծ հարված է հասցնում մեր պետականությանն ու միասնականությանը, դա ևս փաստ է»:

Շարմազանովը դժվարանում է ասել, թե այդ ամենը ովքեր էին կազմակերպել, սակայն կարծում է, որ պետք է ամեն ինչ անել, որպեսզի նման դեպքերը բացառվեն. «Մենք պետք է դասեր քաղենք, որ որևէ մեկը մեր երկրում այդպիսի քայլեր չիրականացնի: Մենք անկախ պետություն ենք և պետք է կարողանանք մերժել բոլոր մերժելի երևույթները: Եթե երկրում տեղի է ունեցել ահաբեկչություն, չպետք է վախենանք ու ասենք, որ դա ահաբեկչություն էր, և կապ չունի այդ ահաբեկչությունն իրականացնողը Նաիրի Հունանյանն էր, թե նախկին ազատամարտիկ»: