Խաչատուր Ավետիսյանի հատընտիր ստեղծագործությունները կհնչեն քանոնահարուհի Մարիաննա Գևորգյանի մեկնաբանությամբ

Նոյեմբերի 5-ին, ժամը 19:00-ին, Կոմիտասի անվան կամերային երաժշտության տանը տեղի է ունենալու Խաչատուր Ավետիսյանի 90-ամյակին նվիրված համերգ, որի ժամանակ հանրապետական ու միջազգային մրցույթների առաջին կարգի մրցանակակիր ու ոսկե մեդալակիր, քանոնահարուհի Մարիաննա Գևորգյանը կհնչեցնի Խաչատուր Ավետիսյանի հատընտիր ստեղծագործությունները' նորովի մշակումներով ու գործիքավորումներով:

«Մի ստեղծագործություն էլ՝ «Աղջիկների պար»-ը, հատուկ այդ օրվա համար գրել է Վարդան Աճեմյանը, ով ևս ներկա կլինի համերգին»,- ԼՈւՐԵՐ.com-ին հայտնեց քանոնահարուհին:

Քանոնահարուհի Մարիաննա Գևորգյանն իր կարիերայի ընթացքում նվագել է Մանկական ֆիլհարմոնիայի, «Արմեն Ակոբ», «Փարվանա» ժող. գործիքների նվագախմբերում, «Սարգա» պարի խմբում, իսկ 2012թ.-ից՝ Սեդրակ Երկանյանի ղեկավարությամբ աշխատում է Կոմիտասի անվան կամերային երաժշտության տան «Տաղարան» հնագույն երաժշտության համույթում՝ որպես մենակատար-քանոնահարուհի։

Նոյեմբերի 5-ին կամերային երաժշտության տանը կայանալիք համերգը սկսվելու է Խ․ Ավետիսյանի «Արցախ» ստեղծագործությամբ: Նվագացանկում ընդգրկված են Խաչատուր Ավետիսյանի լավագույն գործերը՝ «Էքսպրոմտ», «Էլեգիա», «Հուշեր», «Հին Թիֆլիս» և այլն: Համերգային ցանկում ընդգրկված է նաև Աճեմյանի գրած ստեղծագործությունը:

Համերգը լցված է լինելու հայրենասիրական շնչով: Ներկա լինելու եւ համերգը վայելելու հնարավորություն կունենան նաեւ զինծառայողներ և հատուկ խնդիրներ ունեցող մարդիկ: