Ես մի երկու արձագանք լսել եմ, բայց դրանք լուրջ չեմ համարում. Լևոն Զուրաբյանը՝ միասնական պլատֆորմի մասին

Մենք հրապարակային արձագանքներն անլուրջ ենք համարում, քանի որ լուրջ արձագանքները լինում են ոչ հրապարակային, այլ՝ բանակցությունների միջոցով: ԱԺ ճեպազրույցների ժամանակ այսպես արձագանքեց ՀԱԿ խմբակցության ղեկավար Լևոն Զուրաբյանը՝ պատասխանելով հարցին, թե ովքե՞ր են մինչ օրս արձագանքել իրենց կոչին:

Հիշեցնենք, որ ՀԱԿ-ը հայտարարություն էր տարածել, որտեղ միասնականության կոչեր էր հնչեցրել:

Հավատում է թե ոչ այդ միասնականությանը և ովքեր կմիանան իրենց՝ ՀԱԿ խմբակցության ղեկավարը դժվարանում է ասել, սակայն հուսով է, որ լուրջ քաղաքական ուժերի արձագանքները չեն ուշանա, իսկ առայժմ նախընտրում է փակագծերը չբացել:

Պատգամավորը նախընտրում է լռել, քանի որ կարծում է՝ երբ գա իսկական համախմբման ժամանակն, այդ մասին բոլորն էլ կիմանան: «Մենք երբ այդ հայտարարությունն անում էինք, բացարձակապես ակնկալիք չունեինք, որ այդ արձագանքները պետք է լինեն հրապարակային, որովհետև նման արձագանքերը հրապարակային չեն լինում: Դրանք լինում են քաղաքական ուժերի միջև ընթացող բանակցություններով: Ես մի երկու արձագանք լսել եմ, բայց դրանք լուրջ չեմ համարում: Այդ արձագանքներն այդքան էլ կարևոր չեն մեզ համար, որ դրանց մասին խոսենք կամ անդրադառնանք: Ես խոսում եմ լուրջ քաղաքական ուժերի մասին: Բնականաբար, նման ընդդիմադիր բևեռի ձևավորման խնդիրը, որը կարող է քաղաքականացնել այս վիճակը երկրում, որն անմիջապես ազդեցություն կունենա ժողովրդի վրա, այսպես չեն լինում»:

Հարցին, թե երբ կսկսվեն այդպիսի քաղաքական ուժերի հետ բանակցությունները, Զուրաբյանն, իհարկե, դժվարացավ պատասխանել: