Բոլոր պայմանավորվածությունները ներառված են նոր փաստաթղթում. Վահրամ Բաղդասարյան

Եթե վարչապետը և Կառավարության նոր անդամները ցանկություն կունենան դառնալ ՀՀԿ անդամ, կդիմեն, հարցը կքննարկվի և կկայացվի համապատասխան որոշում։

ԱԺ ճեպազրույցների ժամանակ այս մասին հայտարարեց ԱԺ «Հանրապետական» խմբակցության ղեկավար Վահրամ Բաղդասարյանը՝ պատասխանելով հարցին, թե հնարավո՞ր է՝ նոյեմբերի 26-ին ՀՀԿ համագումարին վարչապետ Կարեն Կարապետյանի և ոչ ՀՀԿ-ական նախարարների՝ կուսակցության անդամ դառնալու մասին որոշում կայացվի:

Վահրամ Բաղդասարյանն հավաստիացրեց, թե առայժմ նման դիմումներ չեն ստացել:

Հիշեցնենք, որ ըստ շրջանառվող լուրերի՝ նոյեմբերին կայանալիք ՀՀԿ համագումարին ՀՀԿ ղեկավար կազմում փոփոխություններ են սպասվում: Նախանշվում է, որ կուսակցության գործող փոխնախագահ Հովիկ Աբրահամյանին կփոխարինի ՀՀ նորանշանակ վարչապետ Կարեն Կարապետյանը:

Լրագրողները Բաղդասարյանից հետաքրքրվեցին նաև, թե արդյո՞ք նման հարց կա, որ ընտրական գործընթացը տեսանկարահանելու որոշումը չի կայանա, ինչպես հայտնել էր «Հայ ազգային կոնգրես» խմբակցության ղեկավար Լևոն Զուրաբյանը, Վահրամ Բաղդասարյանը հակադարձեց՝ պնդելով, թե բանակցությունների ժամանակ ձեռքբերված բոլոր պայմանավորվածությունները, որոնք եղել են իշխանության, ընդդիմության, ինչպես նաև՝ քաղաքացիական հասարակության ներկայացուցիչների միջև, դրանք բոլորը ներառված են նոր փաստաթղթում:

«Այն, ինչ պայմանավորվել ենք, ուժի մեջ է: Եթե կան տեխնիկական խնդիրներ, այլ է, բայց նման բան չկա»,-ասաց նա: