«ԱԺ կանոնակարագ» նոր օրենքով ԱԺ փոխնախագահներից մեկը կլինի ընդդիմադիր

Ազգային ժողովի պետաիրավական հարցերի մշտական հանձնաժողովի նախաձեռնությամբ Աժ-ում մեկնարկել են «ԱԺ կանոնակարագ» օրենքի նախագծի վերաբերյալ աշխատանքային քննարկումները:

Հանձնաժողովի նախագահ Հովհաննես Սահակյանը, ներկայացնելով կանոնակարգում տեղ գտած փոփոխությունները, հայտարարեց, որ դրանք նպատակ են հետապնդում ձևակերպել այն լիազորությունները, որոնք տալիս է նոր ընդունված Սահմանադրությունը:

Ըստ այդ փոփոխությունների՝ որևէ օրենք չի կարող նիստի օրակարգ մտնել, եթե քննարկման առարկա չի դարձել ԱԺ մշտական հանձնաժողովի նիստում՝ «Բացառությամբ այն դեպքերի, եթե կառավարությունը հիմնավորի, որ նախագիծը կարևոր է մեր երկրի, մեր պետության համար և պետք է արտահերթ քննարկման առարկա դառնա»:

ԱԺ նոր կանոնակարգով՝ խմբակցություններն ամեն շաբաթ պարտադիր նիստ կգումարեն: «Խմբակցությունների նիստերի ժամանակ որոշումները պետք է կայացվեն ձայների մեծամասնությամբ, և այդ որոշումները լեգիտիմ են, եթե խմբակցության նիստին ներկա են խմբակցության անդամների կեսից ավելին»: Հովհաննես Սահակյանը շեշտեց, որ նոր փոփոխությունները լուրջ վերանայումներ են, որոնք հնչել են մշտապես: Նա նաև նշեց, որ եթե կառավարությունը հիմնավորի, որ իր ներկայացրած նախագիծը հրատապ է, առանց ԱԺ խորհրդում քննարկելու՝ արտահերթ նիստ կգումարվի:

Անդրադառնալով ընդդիմադիրներին տրվող արտոնություններին՝ Սահակյանը շեշտեց, որ ԱԺ փոխնախագահներից մեկը պետք է անպայման լինի ընդդիմադիր պատգամավոր: «Ի տարբերություն գործող կանոնակարգի՝ նորը հնարավորինս պարզ և մատչելի է գրված»,- ասաց նա:

Կատարված փոփոխությունների շրջանակներում էապես մեծացել է նաև մշտական հանձնաժողովների դերը:

Սահակյանը ներկայացրեց նաև քառօրյա նիստերի օրակարգում տեղ գտած փոփոխությունները, ըստ որոնց՝ քառօրյա նիստերի առաջին օրը՝ երկուշաբթի, ԱԺ խորհուրդը օրակարգը կորոշի, իսկ երեքշաբթի օրվանից մինչև ուրբաթ՝ կգումարվեն նիստերը, որոնք կմեկնարկեն առավոտյան ժամը տասից: