ՀՀԿ-ն բիզնես պրոյեկտ է, ում հետ կա օգուտ, նրա հետ է. Գևորգ Մելիքյան

«Առավոտ»ի հետ հարցազրույցում փորձագետ, քաղաքագետ Գևորգ Մելիքյանը այն հարցին՝ արդյո՞ք կարևոր դերակատարություն ունի այն հանգամանքը, թե Կարեն Կարապետյանը կդառնա՞ ՀՀԿ անդամ, թե՞ ոչ, Մելիքյանը պատասխանեց. «ՀՀԿ անդամ դառնալը կարող է ունենալ երկու կողմ՝ ՀՀԿ-ն իրենով կանի՞ Կարեն Կարապետյանին, ինչպես Տիգրան Սարգսյանի պարագայում, և ՀՀԿ-ի թիմը այնուհետ կորոշի, թե քաղաքական ինչպիսի ապագա կունենա Կարեն Կարապետյանը 2017-ի ընտրություններից հետո, թե՞ Կարեն Կարապետյանին կհաջողվի իրենով անել հանրապետականներին, երբ ՀՀԿ տարբեր ներկայացուցիչներ կսկսեն աշխատել նրա համար»:

Եվ այն հարցին՝ արդյոք վերջինն իրատեսակա՞ն սցենար է, պարոն Մելիքյանն այսպես պատասխանեց. «ՀՀԿ-ն բիզնես նախագիծ է, և ով ապահովի օգուտ, նրա կողքին էլ կլինեն. Կլինի դա Սերժ Սարգսյանը, թե՝ Կարեն Կարապետյանը»:
Իսկ թե ի՞նչ ժամկետներում կհստակեցվի Կարեն Կարապետյանի ՀՀԿ-ին անդամակցության հարցը, պարոն Մելիքյանը դժվարացավ պատասխանել, միայն նշեց, որ հնարավոր է Կարեն Կարապետյանը չցանկանա, որ իր քայլերը ասոցացվեն ՀՀԿ-ի հետ, այն դեպքում, երբ ինքն է ջանք, եռանդ ու ժամանակ ներդրել: Մյուս կողմից Մելիքյանը հիշեցրեց, որ Կարեն Կարապետյանը նշանակվել է Սերժ Սարգսյանի կողմից կամ գոնե նրա թուլտվությամբ, ուստի որոշակի թելերով կապված է նրա հետ և դեռ հաշվետու է նրան:

Հարցազրույցն ամբողջությամբ՝ թերթի այսօրվա համարում: