«Պրիմիտիվ գողությունը» փոխարինվում է «ինտիլիգենտ թալանով»

Վարչապետ Կարեն Կարապետյանը կամ չունի բավարար հեղինակություն, կամ էլ` նրա հնչեցրած հայտարարությունները հասարակությանը հրապուրելու համար են և հասցեագրված չեն, ասենք, պետական կառույցներին և պաշտոնյաներին: Պետական պաշտոնյաների գործուղումների համար ավիատոմսերի ձեռքբերման սխեման վարչապետը որակել էր «պրիմիտիվ գողություն» արտահայտությամբ: Քաղաքակիրթ երկրներում այս հայտարարությունը քրեական գործերի և սկանդալային բացահայտումների առիթ կհանդիսանար, բայց Հայաստանում գործադիր իշխանության ղեկավարի խոսքը նույնիսկ զսպող, կանխարգելիչ հետևանք չի ունենում:

Օրինակ ՊՆ-ում, շարուանկում են զբաղվել «պրիմիտիվ գողությամբ» և հոկտեմբերի 24-27-ի համար «Ավիատար գրուպից» Մոսկվայից դեպի Ֆրանկֆուրդ և հետդարձի տոմսը գնել են 897 հազար դրամով, կամ 1700 եվրոյով:

Ենթադրվում է, որ բիզնես կլասի այս տոմսից օգտվել է գլխավոր շտաբի պետ Մովսես Հակոբյանը, ով Գերմանիայում մասնակցել է եվրոպական բանակների ամենամյա համաժողովին: Եթե հարգարժան գեներալը իր ուղևորությունը կազմակերպեր էկոնոմ դասի տոմսով, ապա կծախսվեր 450 եվրո, այսինքն, այս գուցե շատ կարևոր այցը բյուջեի վրա երեքից չորս անգամ էժան կնստեր:

Հիմա կառավարությունում ընտրվել է ավիատոմսերի բոլոր գնումները մեկ խողովակով իրականացնելու տարբերակը: Հասկանալի չէ, թե ինչու կառավարությունը չի ցանկացել այս ոլորտում մրցակցային բաղադրիչ ապահովել: Եթե հավատանք «Ժողովուրդ» օրաթերթի տեղեկությանը, ապա պետական պաշտոնյաներին գործուղումների համար ավիատոմսերի ձեռք բերման էլեկտրոնայյին համակարգը տարեկան մոտ 150 միլիոն դրամի լրացուցիչ եկամուտ է ապհովելու «ԷԿԵՆԳ» ՓԲԸ-ի համար: Թերթը պնդում է, որ այս ընկերության տնօրեն Արթուր Թունյանը՝ կառավարության աշխատակազմի ղեկավար, նախարար Դավիթ Հարությունյանի մերձավորն է: Ստացվում է՝ «գողությունը» մնացել է, պարզապես այն այժմ իրականացվում է ոչ այնքան «պրիմիտիվ եղանակներով»: Հիմա շահույթ են ստանում, ոչ թե մի քանի ավիաընկերություններ և նրանց «պաս տվող» պաշտոնյաներ, այլ կոնկրետ ընկերություն` իր բարձրաստիճան հովանավորով:

Մինչդեռ, հասարակությանն այնքան էլ չի հուզում` իրեն «պրիմիտիվ», թե «ինտիլիգենտ» եղանակով են կողոպտում: Ի վերջո, օրենքը մեղմացուցիչ հանգամանք չի նախատեսում այն գողերի համար, ովքեր ինտիլիգենտ են կամ իրենց հանցանքը «ինտիլիգենտ» փաթեթավորմամբ եմ ներկայացնում:

Սարգիս Հակոբյան