Ազգային ժողովը նախատեսում է վերանորոգել ևս երկու դահլիճ

Ազգային ժողովում շարունակվում են 2017թ.-ի բյուջեի քննարկումները: Քննարկման ընթացքում ԱԺ աշխատակազմի ղեկավար Հրայր Թովմասյանը հայտարարեց, որ հատկացվող բյուջեի շրջանակներում ԱԺ-ը նախատեսում է կահավորել ևս երկու դահլիճ՝ մշտական հանձնաժողովների աշխատանքներն է՛լ ավելի արդյունավետ դարձնելու համար:

«Քանի որ 2017թ.-ից խորհրդարանը գործելու է պառլամենտական կառավարմամբ ու հանձնաժողովները դառնալու են ակտիվ քննարկման հարթակ, անհրաժեշտ է ստեղծել «փոքր խորհրդարաններ», որտեղ կներկայացվեն օրինագծերը, կկազմակերպվեն քվեարկություններ, քննարկումներ: Անհրաժեշտ է, որ երկու դահլիճ կահավորվի մոտավոր այնպես, ինչպես լիագումար նիստերի դահլիճն է»,- նշեց Հրայր Թովմասյանը՝ ընդգծելով, թե դրա համար կպահանջվի 4 միլիոն դրամ:

ԱԺ պատգամավոր Թևան Պողոսյանն էլ հայտարարեց, որ տևական ժամանակ խոսվում է հանձնաժողովների նիստերն ուղիղ եթերով հեռարձակելու մասին, մինչդեռ նիստերն այսօր ուղիղ եթերով չեն հեռարձակվում, ինչպես դա արվում է ԱԺ լիագումար նիստերի ժամանակ: «Գործադիր մարմնի հետ կար պայմանավորվածություն, որ մինչև հունվարի 1-ը ԱԺ-ին հատկացվեր գումար՝ ուղիղ եթերը տրամադրելու համար»,- հավելեց պատգամավորը, որին ի պատասխան Հրայր Թովմասյանն արձագանքեց, որ հանձնաժողովների նիստերի դահլիճի նորոգումը ներառում է նաև տեխնիկական այդ հնարավորությունը: «Տեխնիկական հագեցվածությունը՝ կապի և սարքերի ապահովումը, հնարավորություն կտա հեռարձակել նաև մշտական հանձնաժողովների նիստերը»,- վստահեցրեց նա: