Հարկային խաղեր

Այս տարվա մայիսի մեկից պարտադիր գործարկվելու էին նոր սերնդի ՀԴՄ-ները:

Օրենքով: Կառավարության որոշում էր, օրինազանցներին էլ տուգանք էր հասնում:

Չեղավ ոչ մեկը, ոչ՝ մյուսը: Ապրիլին կառավարությունը որոշեց, որ հարկ վճարողները մինչև մայիսի 1-ը համապատասխան քանակի նոր սերնդի ՀԴՄ-ներով ապահովվել չեն կարող, վաղեմի որոշումը ռիսկային համարվեց և նոր վերջնաժամկետ սահմանվեց՝ 2017թ. հունվարի 1-ը:

Իսկ ինչու՞ չէին կարող: Թանկ են: Թեպետ՝ կարող էին ավելի թանկ լինել: Դեռ 3 տարի առաջ հրապարակվել էր սարքի արժեքը՝ 150 հազար դրամ, որը վերանայվեց 2014թ.-ին և այն ժամանակ Ֆինանսների նախարար Գագիկ Խաչատրյանը, ներկայացնելով փոփոխությունները՝ նշեց, որ 5.0 մլն դրամից մինչև 10.0 մլն դրամ իրացումից հասույթ ունեցող հարկ վճարողների համար հսկիչ դրամարկղային մեքենաների իրացման գին է սահմանվում առավելագույնը՝ 80 հազար դրամ, իսկ մինչև 5.0 մլն դրամ իրացումից հասույթ ունեցող հարկ վճարողների համար հսկիչ դրամարկղային մեքենաների իրացման գինը լինելու է 60 հազար դրամը:

Կարծեք թե ոչ մի խնդիր, այլևս, չպետք է լինի. սարքը համեմտաբար մատչելի է դարձել, ՓՄՁ-ներն էլ դեռ ժամանակ ունեն նոր սարք գնելու:

Պարզվում է, սակայն, հիմա էլ՝ սարքը չկա:

Այն տրվում, ավելի ճիշտ՝ վաճառվում էր «Հսկիչ-դրամարկղային մեքենաների ներդրման գրասենյակ» ՊՈԱԿ-ի կողմից: Այսօր, սակայն, եթե այնտեղ գնաս, կտեղեկանաս, որ սարքը սպառվել է, իսկ թե երբ կլինի նոր խմբաքանակը՝ անհայտ է:

Մնում է մեկ տարբերակ՝ գնել վերավաճառողներից: Այս դեպքում պատրաստ եղիր վճարել առնվազն 120 հազար դրամ՝ այսինքն՝ երկու անգամ ավելի, այն էլ՝ եթե իհարկե բախտդ բերի ու գտնես այդ գնով: Շատերը սարքն առաջարկում են 130-140 հազար դրամով:

Ու եթե փորձես զանգահարել վերավաճառողներին, ապա կհասկանաս, որ այդ սարքերն էլ վերջանալու եզրին են:

Ստացվում է՝ օրենք ենք մշակում, տուգանքներ որոշում և միայն պարտադրում՝ ամեն գնով ձեռք բերել նոր սերնդի ՀԴՄ՝ չմտածելով, որ կարելի է նախ բավարար քանակի սարք ներմուծել, նոր՝ պարտադրել:

Մի փոքր խնդրի մեջ խորանալու դեպքում, սակայն, բախվում ենք մեկ այլ իրականության: Հերթական լավ կազմակերպված բիզնես-քայլ, որը միլիոններ բերեց որև մեկին:

Հերթական անգամ կառավարությունը, իր իսկ որոշման համաձայն, պարտադրեց մեզ գնել որևէ սարք, սպառեց իր ներկրած ապրանքն ու փոշմանեց. չէ՛, դեռ վա՛ղ է անցնել նորին:

Պարզվում է՝ 2017 թվականին էլ սարքը պարտադիր չի լինելու:

ՊԵԿ-ը կառավարության քննարկմանն է ներկայացնելու «Հսկիչ-դրամարկղային մեքենաների կիրառման մասին» ՀՀ օրենքում փոփոխություն կատարելու մասին» ՀՀ օրենքի նախագիծ, որով նախատեսում է նոր սերնդի ՀԴՄ-ների ներդրման ժամկետը 2017 թվականի հունվարի 1-ից հետաձգել մինչեւ 2018 թվականի հունվարի 1-ը, ինչը հնարավորություն կտա ՓՄՁ ոլորտի տնտեսավարող սուբյեկտներին՝ առավել սահուն իրականացնել նոր սերնդի ՀԴՄ-ների ներդրման գործընթացը:

ԼՈւՐԵՐ.com-ի տեղեկություններով՝ օրենքի նախագիծն արդեն իսկ արժանացել է կառավարության հավանությանը և այն ձևական ընթերցվելու է նիստի ժամանակ՝ պաշտոնական կողմն ապահովելու համար:

Վերջ: Իրենք իրենց ներկրած ապրանքը վաճառեցին: Սպառեցին եղածը, հերթական անգամ հարստացան մեր հաշվին ու բարերարի դեմքով հայտարարում են. «Մենք այնքան լավն ենք, որ նոր սարքը պարտադիր կլինի 2018-ից միայն»:

Անի Սահակյան