«Վարչապետը չի կարող ԱԺ-ին հանձնարարական տալ». Հրայր Թովմասյան

Ենթադրում եմ՝ ԱԺ աշխատակազմում էական կառուցվածքային փոփոխություններ կլինեն, այդ թվում՝ կլինեն նաև որոշակի կրճատումներ: ԱԺ-ում լրագրողների հետ զրույցում անդրադառնալով նկատելի կրճատումներին, նման տեսակետ հայտնեց ԱԺ աշխատակազմի ղեկավար Հրայր Թովմասյանը՝ հավելելով, որ պետք է հստակ լինի, թե ով և ինչ է անում:

Շարունակելով խոսքը՝ պաշտոնյան ընդգծեց, թե 2014 թվականից ի վեր՝ շուրջ 40 աշխատակից է արդեն կրճատվել, իսկ մինչև տարեվերջ՝ մի շարք պայմանագրեր, որոնք վաղուց են կնքված եղել՝ չեն երկարաձգվի:

Անդրադառնալով պատգամավորների թվի նվազմանը՝ Հրայր Թովմասյանը նշեց, որ 2017 թվականին կայանալիք խորհրդարանական ընտրություններից հետո առաջին 6 ամսում խորհրդարանում կլինի 131 պատգամավոր, ովքեր կստանան այն աշխատավարձը, ինչ ստանում են ներկայում: «Դրանից հետո մնացած 6 ամսվա համար կառավարությունը հիմք է ընդունել 101 թիվը, ինչը սահմանված է Սահմանադրությունում՝ որպես պատգամավորների նվազագույն թիվ, և դրանցով էլ հաշվարկել է, թե պատգամավորները որքան աշխատավարձ են ստանալու»:

ԱԺ աշխատակազմի ղեկավարը չի բացառում նաև, որ սահմանված 101 պատգամավորների թիվը գերազանցի: Հավանաբար, կավելանան ևս 4-ը, ովքեր կլինեն ազգային փոքրամասնությունների ներկայացուցիչներ:

«Արդյունքում՝ պատգամավորների թիվն, ընդհանուր առմամբ, կդառնա 105-ը»,- ասաց նա:

Լրագրողի դիտարկմանը՝ վարչապետ Կարեն Կարապետյանը հայտարարել էր, թե պետք է բացառել մայր- աղջիկ նույն տեղում աշխատելու հնարավորությունը և գաղտնիք չէ, որ ԱԺ-ում օգնականներից շատերը հենց պատգամավորների երեխաներն են, այդ ուղղությամբ ինչ քայլեր են կատարվելու, Թովմասյանն արձագանքեց. «Ֆորմալ առումով պատգամավորների օգնականներին աշխատանքի է ընդունում աշխատակազմի ղեկավարը, բայց նրանց ընտրությունը վերապահված է պատգամավորներին: Աշխատակազմի ղեկավարն ունի զրո լիազորություն և չի կարող որոշել, թե ով պետք է լինի պատգամավորի օգնականը: Այդ հաստիքը հայեցողական է, և պատգամավորն ինքն է որոշում»:

ԱԺ աշխատակազմի ղեկավարը հավելեց նաև, թե ինքը չգիտի՝ ո՞ր պատգամավորի երեխան է աշխատում որպես օգնական, բայց գիտի՝ վարչապետի հանձնարարականը վերաբերում է միայն դպրոցներին: «Վարչապետի հանձնարարականը վերաբերում էր ուսուցիչներին և վարչապետը չի կարող ԱԺ-ին հանձնարարական տալ»,-շեշտեց Հրայր Թովմասանը:

Ի դեպ, Հրայր Թովմասյանը չբացառեց նաև հանձնաժողովներում հաստիքների ավելացումը: