Կառավարությունը լինելու է փոքրամասնություն, իսկ ընդդիմությունը՝ մեծամասնություն. Դավիթ Հարությունյան

«Առաջարկում եմ, որ պարոն Զուրաբյանին հարց ուղղեք, թե ո՞վ է ասում, որ ինչ-որ խոշոր ընտրակեղծարարներ ցանկանում են չեղարկել համաձայնագիրը»: ԱԺ-ում լրագրողների հետ զրույցում, անդրադառնալով ՀԱԿ խմբակցության ղեկավար Լևոն Զուրաբյանի հայտարարությանն, այսպես արձագանքեց կառավարության աշխատակազմի ղեկավար-նախարար Դավիթ Հարությունյանը:

«Սկզբից պետք է փորձել պարզել, թա նա ինչ նկատի ունի, նոր հետաքրքրվել. փորձեք պարզել»,- հավելեց նա:

Հիշեցնենք, որ Լևոն Զուրաբյանը հայտարարել էր, որ տեսախցիկների տեղադրումը բոլոր ընտրատեղամասերում և օնլայն հեռարձակումը՝ իշխանության հետ իրենց պայմանավորվածության անբաժանելի մասն են, իսկ իրենք արդեն խոսակցություն են լսում, թե ինչ-որ խոշոր ընտրակեղծարարներ ցանկանում են չեղարկել 4+4+4 ձևաչափով բանակցություններում ստորագրված համաձայնագրի այդ հատվածը:

Հարցին՝ բացառո՞ւմ եք, որ տեսախցիկների տեղադրման հետ կապված խնդիրներ կառաջանան, Դավիթ Հարությունյանը պատասխանեց, թե հնարավոր է՝ գումարները չբավարարեն, սակայն վստահեցրեց, որ տեսախցիկների հետ կապված խնդիրներ չեն առաջանա: «Տեսախցիկների հետ կապված տեխնիկական խնդիր լինել չի կարող: Բոլորիդ մոտ էլ տեսախցիկ կա, բայց խնդիրը կարող է լինել այն, որ գումարները չբավարարեն: Եվ այդ իսկ պատճառով որևէ կազմակերպություն հանձն չառնի կատարելու այդ աշխատանքը»,- ասաց նա:

Պաշտոնյան տեղեկացրեց նաև, որ այս պահին տեսախցիկների հարցով դեռևս որևէ կազմակերպության հետ բանակցություններ չեն ընթանում. «Դա արվելու է բաց սկզբունքով, այսինքն՝ այն կազմակերպությունը, որը կբավարարի եռակողմ հանձնաժողովի որակական պահանջներին, այն էլ կմասնակցի: Այդ իսկ պատճառով՝ առաջին իսկ օրվանից շեշտադրել ենք, որ պատասխանատվությունը չի լինելու միայն կառավարության ուսերին: Լինելու է եռակողմ հանձնաժողով, որտեղ կառավարությունը լինելու է փոքրամասնություն, իսկ ընդդիմությունը՝ մեծամասնություն, այդ թվում՝ քաղհասարակության ներկայացուցիչները»: