Սյունիքի գործող և նախկին մարզպետների հարաբերությունները բարիդրացիական են

Սյունիքի մարզպետ Վահե Հակոբյանը վստահեցնում է, որ մարզում բարոյահոգեբանական մթնոլորտը գտնվում է գերազանց վիճակում: «Մարզում ծանր մթնոլորտ բացարձակ չկա, նորմալ աշխատանքային մթնոլորտ է ձևավորվել»,-ԱԺ-ում պատասխանելով լրագրողների հարցերին, ասաց Սյունիքի նորանշանակ մարզպետը:

Նա վստահեցրեց նաև, որ նախկին մարզպետ Սուրիկ Խաչատրյանի՝ պաշտոնից ազատումից հետո, կադրային փոփոխություն մարզպետարանում գրեթե չի եղել:

Հիշեցնենք, որ մամուլը գրել էր, թե Սուրիկ Խաչատրյանից հետո նորանշանակ մարզպետ Վահե Հակոբյանը մարզպետարանում կադրային ջարդ է սկսել:

«Մարզպետարանի աշխատակիցների 90 տոկոսը չի փոխվել: Արդեն փոխվել են, հետագայում էլ կփոխվեն այն անձինք, ովքեր իրենց տեղում չեն, և ոչ էլ մասնագետ են»,- ասաց նա:

Լրագրողները հետաքրքրվեցին նաև Սուրիկ Խաչատրյանի խորհրդական Զարզանդ Նիկողոսյանի՝ պաշտոնից հեռանալու մասին, որին ի պատասխան մարզպետը նշեց, որ Նիկողոսյանն ազատվել է աշխատանքից՝ սեփական դիմումի համաձայն:

Հակոբյանի խոսքով՝ վերջին շրջանում ինքը հանդիպել է նաև Սուրիկ Խաչատրյանի հետ. Նրա հավաստմամբ՝ իրենք պարզապես զրուցում են. «Եթե ինչ-որ խնդիրներ են առաջանում, ինքն է զանգում, կամ՝ ես: Տարբեր բնույթի խնդիրների շուրջ ենք զրուցում, հրավիրում ենք միջոցառման, կարող է լինել այդ միջոցառումը Երևանում, ասենք՝ ինչ-որ հուշարձանի բացում, կամ՝ կարող է լինել Երկրապահի հետ կապված»,- ասաց նա՝ ընդգծելով նաև, որ ինքը բարիդրացիական հարաբերությունների մեջ է նախկին մարզպետի հետ:

Ինչ վերաբերում է հետագա անելիքներին՝ մարզպետը տեղեկացրեց, որ շուտով կհիմնվի Սյունիքի զարգացման և ներդրումների հիմնադրամ և կառավարության որոշմամբ՝ այն կաշխատի և կփորձի փակել բոլոր դեֆիցիտները: «Դա վերաբերում է գյուղատնտեսությանն ու առողջապահությանը»,- հավելեց նա:

Վ. Հակոբյանն ընդգծեց նաև, որ այսօր դեֆիցիտները բավականին շատ են, թեև, ըստ նրա՝ դրանք բնական և օբյեկտիվ պատճառներով են առաջացել:

Դիտարկմանը՝ ստացվում է, որ պարտքերով է ընդունել մարզը, Հակոբյանը պատասխանեց. «Ամեն տարի այդպես է լինում և նորություն չէ»:

Հարցին, թե ինչպե՞ս է պատրաստվում ՀՀԿ-ի իշխանությունը մարզում պահպանել, քանի որ Սուրիկ Խաչատրյանը երկրորդ անգամ վերանշանակվեց հենց այդ նպատակով, որ ՀՀԿ-ի դիրքերն ամուր պահի, Հակոբյանը պատասխանեց. «Ես անկուսակցական եմ և իմ դիմաց նմանատիպ խնդիր դրված չէ»: