Գիշերը երեխան վախից զարթնել է, տեղաշորն ամբողջությամբ ջրի մեջ էր. Լենուղի գյուղի բնակիչներն անելանելի դրության մեջ են (ֆոտո, վիդեո)

1988 թվականի երկրաշարժի ժամանակ՝ Արմավիրի մարզի Լենուղի գյուղում գտնվող հանրակացարանային մի քանի շենք 4-րդ կարգի վթարային դարձավ: Հանրակացարանի բոլոր մասնաշենքերը վթարային են, մարդկանց սենյակները փլվելու վտանգի տակ են: Բնակիչներն արդեն 25 տարի է՝ բնակվում են վթարային շենքում՝ հույս ունենալով, որ կառավարությունն իրենց բնակարանով կապահովի:

Բնակիչները պարբերաբար կառավարության մոտ բողոքի ակցիաներ են իրականացնում: Նորանշանակ վարչապետ Կարեն Կարապետյանի նշանակումից հետո Լենուղի գյուղի բնակիչներն առաջին անգամ էին եկել Կառավարության շենքի մոտ: Նրանք բավական վրդովված էին: Եղանակային վատ պայմանները լցրել են նրանց համբերության բաժակը: Վթարային շենքում բնակվելն անհնար է: Անձրևները, ձյունը լցվում է տները, երեխաները գիշերները խոնավությունից ու արհեստական անձրևից չեն կարողանում քնել: 

Հանրակացարանի երեք շենքի 29 ընտանիքի բնակարաններով ապահովելու համար կառավարության կողմից հատկացվել էր 195 մլն դրամ, սակայն ընդամենը 8 ընտանիք է ստացել բնակարան: Գյուղի բնակիչները մեղադրում են Արմավիրի մարզպետ Աշոտ Ղահրամանյանին՝ իրենց խաբելու համար: 

Մանրամասները՝ ԼՈՒՐԵՐ.com-ի տեսանյութում:

Քրիստինա Աղալարյան