Չնեղանա՛ս պարոն նախարար, բայց հանրապետությունում չկա մի տղա, ով «Վինար»-ի Ավետից կկարողանա փող ստանալ (տեսանյութ)

Այսօր Կառավարության դիմաց կրկին հավաքվել էին Արարատի մարզի Քաղցրաշեն համայնքի խաղողագործները, ովքեր պահանջում էին իրենց մթերած խաղողի գումարները: Քաղցրաշենցիները մոտեցան կառավարության շենքից դուրս եկող գյուղատնտեսության նախարար Իգնատի Առաքելյանին: Նախարարը քաղցրաշենցիներին ասաց, որ դեռ հստակ չի կարող ասել՝ իրենց գումարները երբ կլինեն: 

«Չնեղանա՛ս, պարոն նախարար, բայց հանրապետությունում չկա մի տղա, ով «Վինարի» Ավետից կարողանա փող ստանալ: Նա թալանչի ա, հանցագործ ա: Թե ինչ ա տալիս, ինչ չի տալիս, չենք հասկանում: Պարոն նախարար, մենք եկել ենք փողի համար»,- դիմելով նախարար Առաքելյանին՝ ասում էին քաղցրաշենցիները: 

Նշենք, որ «Վինար» ՍՊԸ տնօրեն Ավետիք Գալստյանի ղեկավարած ընկերությունն ունի դեռևս 2015 թվականին մթերված խաղողի դիմաց չվճարված ֆինանսական պարտավորություններ՝ գյուղացիների նկատմամբ:

Գյուղացիները նախարարին բողոքեցին, որ բանկերն իրենց անհանգստացնում են: Նրանք վարկային պարտավորություններ ունեն «ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿ» -ում, գումարները չստանալու պատճառով չեն կարողանում կատարել առաջիկա ամսվա վճարումները: 

Առաքելյանն էլ ասաց, որ բանկին անձամբ է խնդրել չանհնագստացնել նրանց, քանի դեռ խաղողի մթերման գումարները չեն ստացել: Ավելի վաղ՝ Իգնատի Առաքելյանը խնդրի կողմերի հետ հանդիպման ժամանակ հենց գյուղացիների ներկայությամբ հեռախոսազրույց էր ունեցել բանկի գլխավոր գործադիր տնօրեն Հակոբ Անդրեասյանի հետ և խնդրել քննարկել մինչև վերոնշյալ գործարքի կնքումը՝ գյուղացիների վարկերի վճարների հետաձգման հնարավորությունը:

Մանրամասները՝ ԼՈՒՐԵՐ.com-ի տեսանյութում:

Քրիստինա Աղալարյան