Վստահ եմ` կարող ենք հաջողություն ունենալ. Արթուր Պետրոսյանը ներկայացվեց հավաքականի մարզչի պաշտոնում

Հայաստանի ֆուտբոլի ֆեդերացիայի նախագահ Ռուբեն Հայրապետյանը Ավանի ֆուտբոլի ակադեմիայում ներկայացրեց Հայաստանի հավաքականի նորանշանակ գլխավոր մարզիչ Արթուր Պետրոսյանին:

ԼՈւՐԵՐ.com-ի փոխանցմամբ՝ նորանշանակ մարզիչը լրագրողների հետ զրույցում նշեց,որ ամենակարևորն այս պահին թիմի առաջընթացն է:

«Պետք է փորձենք հոգեբանական վիճակի վրա ազդել, դրական էներգիա փոխանցել թիմին: Վստահ եմ, որ կարող ենք հաջողություն ունենալ: Եթե վստահ չլինեի, որ կարող ենք մի բան փոխել և դրական արդյունք ստանալ, հաստատ չէի համաձյանի գալ: Երկար տարիներ խաղացել եմ հավաքականում, գիտեմ ոնց է աշխատում ներքին խոհանոցը: Չեմ ասի՝ ժամանակ է պետք, կարճ ժամանակ է մնացել: Ես վստահ եմ, որ այս խաղին էլ ենք պատրաստ լինելու և ամեն ինչ անելու ենք՝ հաղթանակի հասնելու համար: Հրաժարական տալու մասին չեմ մտածում, նոր եմ նշանակվել և չեմ կարող ասել, թե ինչ է լինելու մի տարի հետո: Ժամանակը ցույց կտա»:

Նորանշանակ մարզիչը լրագրողների հետ զրույցում նշեց, որ մարզչական շտաբում իրեն օգնելու են Ռազմիկ Գրիգորյանը և Սարգիս Հովհաննիսյանը: Վերջինս կշարունակի աշխատել նաև «Լոկոմոտիվում»:

Խոսելով ֆուտբոլիստների մասին՝ Պետրոսյանը նշեց, որ հավաքականում բոլոր ֆուտբոլիստների ընտրությունն ինքն է կատարել մարզչական շտաբի հետ միասին և Գևորգ Ղազարյանն այդ ֆուտբոլիստների թվում է:

Մարզիչը խոսեց նաև նոյեմբերի 11-ին Չեռնոգորիայի դեմ կայանալիք խաղի մասին.

«Հասցրել ենք ուսումանասիրել: Շատ ուժեղ մրցակից է, բայց մենք շանս ունենք այդ մրցակցի դեմ: Ամեն ինչ անելու ենք այդ շանսը օգտագործելու համար»:

Վերջում ՀՖՖ նախագահը մարզչին նվիրեց հավաքականի մարզաշապիկը:

Արթուր Պետրոսյանը սկսել է մարզչական գործունեությունը 2006 թվականին՝ գլխավորելով «Ցյուրիխի» Մ-14, 15, 16, 18 թիմերը: 2011 թվականին «Ցյուրիխի» Մ-18 թիմի հետ դարձել է Շվեյցարիայի չեմպիոն: