Նախագահների հանդիպման մասին որևէ պայմանավորվածություն առայժմ չկա. Շավարշ Քոչարյան

Ադրբեջանի կողմից սադրիչ գործողությունների չնվազելը ևս մեկ անգամ փաստում է այն մասին, որ Վիեննայի և Սանկտ Պետերբուրգի բոլոր համաձայնությունները կյանքի չեն կոչվել, որոնք, սակայն, պետք է կյանքի կոչվեն: Ազգային ժողովում, լրագրողների հետ զրույցում անդրադառնալով հակառակորդի ակտիվ գործողություններին, ասաց ՀՀ փոխարտգործնախարար Շավարշ Քոչարյանը:

«Մեր շեշտադրումները հենց այս ուղղությամբ են փոխվել»,- հավելեց նա:

Շավարշ Քոչարյանը համամիտ չէ այն տեսակետի հետ, որ Հայաստանի արտգործնախարարությունը ընտրել է ոչ ճիշտ մարտավարություն: Ավելին՝ նա վստահեցնում է, որ հայկական կողմն արել ու անում է ամեն ինչ, որպեսզի բանակցային գործընթացը դուրս գա փակուղուց, սակայն Ադրբեջանն իր այս վարքագծով ևս մեկ անգամ ցույց է տալիս, որ  պատրաստ չէ հարցին խաղաղ լուծում տալ:

Փոխարտգործնախարարը համոզված է նաև, որ բանակցային գործընթացը փակուղում է հայտնվել ոչ թե Հայաստանի ու Հայաստանի արտգործնախարարության, այլ հենց Ադրբեջանի ջանքերով: «Եկեք ճիշտ հասկանանք. կրակողին խոսքով չեն հասկացնում»,- արձագանքեց նա, հավելելով, որ այն, ինչ վերաբերում է խոսքին, խոսքն ասվում է, բայց Հայաստանը գործ ունի մի սուբյեկտի հետ, որն ընտրել է նման քաղաքականություն:

Փոխնախարարի խոսքով՝ պատահական չէ նաև Հայաստանի որդեգրած այն գիծը, որը վարում է մասնավորապես ապրիլյան պատերազմից հետո. «Դրա ուղղություններից մեկը վերաբերում է կրակի դադարեցման ամրապնդմանը: Մենք միշտ ասել ենք, որ պետք է ստեղծվեն համապատասխան մեխանիզմներ, որպեսզի սահմանում բացառվեն կրակոցներն ու սադրանքները»,- ասաց նա՝ շեշտելով նաև, որ այդ ուղղությամբ էլ Հայաստանն օգտագործում է իր հնարավոր բոլոր լծակները:

ԼՈՒՐԵՐ.com-ի դիտարկմանը՝ սովորաբար հակառակորդն ակտիվանում է ինչ-որ հանդիպումներից առաջ, հնարավո՞ր է, որ առաջիկայում հանդիպեն նաև երկու երկրների նախագահները, Շավարշ Քոչարյանն արձագանքեց, որ նախագահների հանդիպման հարց՝ այս պահին չի քննարկվում. «Այսօր նախագահների հանդիպման մասին որևէ պայմանավորվածություն չկա: Առայժմ խոսքը գնում է միայն արտգործնախարարների մակարդակով հնարավոր հանդիպման մասին»,- ասաց նա: