Լևոն Ալթունյանին չի հետաքրքրում «Երևան» ԲԿ-ի սկանդալը

Օրերս մամուլում հայտնվեց սկանդալային մի պատմություն, որտեղ Հանրապետության վեցերորդ հիվանդանոցի հիմնադիր Տարոն Տոնոյանը հայտարարեց, որ Զորի Բալայանի որդին ուզում է հիվանդանոցը խլել իր ձեռքից:

Հիշեցնենք, որ հիվանդանոցն այժմ կոչվում է «Երևան» բժշկական կենտրոն:

ԼՈՒՐԵՐ.com-ի տեղեկություններով, թեև պաշտոնապես չի հայտարարվել, բայց հիվանդանոցն արդեն մի քանի օր է՝ չի գործում: Հիվանդանոցի աշխատակիցներն աշխատանքից ազատման դիմում են ներկայացրել և մտադիր չեն աշխատել Զորի Բալայանի որդու հետ: Նրանք համառորեն պնդում են, որ պաշտպանում են Տարոն Տոնոյանին:

ԱԺ-ում լրագրողների հետ զրույցում ՀՀ առողջապահության նախարար Լևոն Ալթունյանը չցանկացավ անդրադառնալ այս սկանդալային պատմությանը, հավելելով՝ ինքը չի հանդիպել է ո՛չ Զորի Բալայանի որդու, ո՛չ էլ Տարոն Տոնոյանի հետ:

«Հանդիպեմ ի՞նչ անեմ, որպես ի՞նչ հանդիպեմ, կամ ո՞ւմ հետ հանդիպեմ… Ի՞նչ նպատակով հանդիպեմ, առողջացնե՞մ իրենց ընկերությունը»,- հարցին հարցով պատասխանեց նախարարը՝ նշելով, որ այդ հիվանդանոցն առևտրայն ընկերություն է, որը շահույթ հետապնդող հիմնարկ է:

«Թող բարի լինեն՝ իրենք-իրենց հոգան սեփական կոմերցիոն հոգսերը: Դա ընդամենը կոմերցիոն հոգս է, և ոչ մի կապ չունի բժշկության հետ»,- ասաց Լ. Ալթունյանը:

Դիտարկմանը՝ Տարոն Տոնոյանը հայտարարել է, որ հիվանդանոցը խլում են իր ձեռքից, նախարարը նշեց, որ այդպիսի հայտարարություններով պետք է հետաքրքրվի ոչ թե ինքը, այլ՝ Գլխավոր դատախազությունը:

Անդրադառնալով ալյուրի հարստացման ծրագրին, որի կնքահայրը նախկին նախարար Արմեն Մուրադյանն էր, նորանշանակ նախարարն ընդգծեց, որ ինքը չի ցանկանում խոսել նախկին նախարարի մասին, և հավելեց. «Այսօրվա իմ առօրյան մի քիչ այլ ասպարեզում է ընթանում, դեռ չի անդրադարձել այդ ծրագրին»,- ասաց նա:

Դիտարկմանը՝ Ձեզ չե՞ն հետաքրքրում այդպիսի ծրագրերը, նախարարն արձագանքեց. «Ցտեսություն»…