Անառողջ է, երբ բժիշկը ֆինանսիստ է աշխատում. առողջապահության նախարար

Առողջապահության նախարար Լևոն Ալթունյանը պետպատվերով բուժումների քանակի կրճատման մասով դեռևս որոշում չի կայացրել: ԱԺ-ում լրագրողների հետ զրույցում նախարարը հավաստիացրեց, թե հարցը դեռևս ուսումնասիրվում է: «Միգուցե բացարձակապես այս մոդելին նաև չանդրադառնանք և նպատակահարմար չգտնենք»,- ասաց նա:

Նախարարի խոսքով՝ պետպատվերով բուժման դեպքում՝ այսուհետ գումարը «կհետևի» հաճախորդին, այսինքն՝ հիվանդն ինքը կընտրի հիվանդանոցը, ոչ թե նախորդի նման կուղարկեն այնտեղ, որտեղ կա պետպատվերով բուժման տեղ:

Անդրադառնալով վերջերս իր աշխատելաոճի հետ կապված աղմուկին, թե Առողջապահության նախարարությունում մասնագիտությամբ բժիշկ աշխատակիցները կփոխարինվեն ոլորտային մասնագետներով, նա նշեց, որ ինքն աշխատակիցներից դժգոհություններ չի լսել:

Հարցին՝  նախարարության 95 տոկոսը բժիշկներ են, պետք է 95 տոկոսն էլ կրճատվե՞ն, ինչպե՞ս է պատրաստվում այս խնդիրը լուծել, նա հավելեց. «Որ կվերածեմ, կիմանաք, դեռևս չգիտեմ՝ ինչպես պետք է անեմ: Ես կրկնում եմ, որ անառողջ է, երբ ֆինանսիստն աշխատում է բժիշկը: Եթե մենք ֆինանսական ոլորտում կգտնենք բժիշկ, մենք նրան կկրճատենք, եթե ֆինանսական հաստիքում աշխատում է ֆինանսիստ, ապա նա կմնա աշխատանքի»:

Նորանշանակ նախարարը հերքեց նաև այն լուրերը, թե ինքը նախարարության աշխատակիցներին հորդորել է խոսել և թղթաբանությունը կազմել ռուսերեն լեզվով: «Դա ակնհայտ սուտ է: Հայաստանի մայրենի ու պետական լեզուն հայերենն է»,- ընդգծեց նա:

Դիտարկմանը, որ ՊՆ նախկին նախարարի կինը՝ «Ռազմական բժիշկների ասոցացիա» ՀԿ նախագահ Ռուզաննա Խաչատրյանը ցանկություն չունի իր հետ աշխատելու, նախարարարն արձագանքեց. «Ցավում եմ դրա համար»:

Ինչ վերաբերում է Ռուզաննա Խաչատրյանի հեռացման խնդրին, Լևոն Ալթունյանն ավելացրեց, որ այդ որոշում կայացնելու իրավունքը պատկանում է բացառապես Ռուզաննա Խաչատրյանին: «Եթե նա նման որոշում կայացնի, ինձ մնում է միայն է մակագրել իր դիմումը»:

Հիշեցնենք նաև, որ մամուլում օրերս լուրեր շրջանառվեցին, թե փոխնախարարներից մեկը տեղափոխվել է Ռուզաննա Խաչատրյանի սենյակ: Նախարար Ալթունյանը հավաստիացրեց, որ այդ և նման լուրերը չեն համապատասխանում իրականությանը:

«Փոխնախարարը նստած է իր սենյակում, սենյակը պատկանում է պետական գույքի կառավարման մարմիններին, նախարարության մեջ չկա Ռուզաննա Խաչատրյանի կամ Լևոն Ալթունյանի սենյակ»: