Ամերիկյան ընտրությունների սարսափը

ԱՄՆ-ի նախագահական ընտրությունները վաղուց դադարել են բացառապես ներքաղաքական իրադարձություն լինելուց եւ իրենց հետևանքով ազդում են համաշխարհային քաղաքականության վրա։

Ավարտվող ընտրարշավը սկանդալային է՝ ոչ այնքան թեկնածուների փոխադարձ մեղադրանքներով, այլ հատկապես այն հանգամանքով, որ դրանք կարող են փոխել Ամերիկան, աշխարհը։

Այս ընտրությունները ամերիկյան քաղաքական համակարգի ինստիտուցիոնալ ճգնաժամի դրսևորումն են։ Դոնալդ Թրամփի առաջադրումը, նրա քաղաքական հաջողությունները հենց դրա հետեւանքն են։ Հիլլարի Քլինթոնը ներկայացնում է հենց այն համակարգը, որն այլեւս օտար է միլիոնավոր ամերիկացիների համար, այլևս չի մարմնավորում նրանց երազանքները։ Իրապես Հիլլարին, մեղմ ասած, չի վայելում ամերիկացիների մեծամասնության սերն ու համակրանքը։ Այս ամենով հանդերձ՝ Քլինթոնը քաղաքական գործիչ է՝ ի տարբերություն նրա մրցակից, համակարգին «ձեռնոց նետած» Դոնալդ Թրամփի, ով «հասարակ մարդկանց» անունից մատահրավեր է նետել բոլորին, ովքեր հակադրվում են հանրապետական թեկնածուի պոպուլիզմին։ Թրամփը ոչ թե այլընտրանք է, այլ մի թեկնածու, ում հնարավոր նախագահության հեռանկարը սարսափի մեջ է պահում ամերիկացիների մեծամասնությանը, ԱՄՆ դաշնակիցներին։

Ամերիկան կանգնած է վատի եւ վատթարագույնի ընտրության առաջ։ Ընտրությունների հավանական հաղթողը՝ Հիլլարի Քլինթոնն, ունենալու է քաղաքական լեգիտիմության լուրջ պրոբլեմ, որովհետև Սպիտակ տանը հայտնվելու է Թրամփին մերժողների քվեով։

Անկախ քվեարկության արդյունքներից՝ այս ընտրությունների «հերոսը» Թրամփն է ու այդ «ուրվականը» Հիլլարիին ուղեկցելու է հնարավոր նախագահության ողջ ընթացքում։

Սարգիս Հակոբյան