Հովհաննես Մարգարյանը որոշել է բոյկոտել Գյումրու ավագանու ընտրությունների արդյունքներն ու չհրաժարվել պատգամավորական մանդատից

Հաշվի առնելով այն, որ գործող պատգամավոր եմ, արդեն ԱԺ-ի նախագահին լրացուցիչ դիմումով տեղյակ եմ պահել, որ բոյկոտել եմ Գյումրու ավագանու նիստերն ու իմ թիմակիցների հետ հրաժարվել եմ իմ այդ 4 մանդատներից: ԼՈՒՐԵՐ.com-ի թղթակցի հետ զրույցում ասաց ԱԺ ՕԵԿ խմբակցության պատգամավոր Հովհաննես Մարգարյանը, նշելով՝ ոչ միայն ինքը, այլ ԲՀԿ և ԳԱԼԱ կուսակցությունների ներկայացուցիչները բոյկոտել են այդ ընտրությունները, քանի որ, ըստ էության, իրենց քվեն գողացվել է:

«Ձեռքդ պետք է մի բան լինի, չէ՞, որ որոշում կայացնես: Հրաժարվել ենք ընդհանրապես մանդատը ստանալուց, որի մասին տեղյակ ենք պահել նաև թիվ 34 ընտրատարածքի տեղական ընտրական հանձնաժողովին»,- ասաց պատգամավորը:

Հիշեցնենք, որ մամուլն այսօր գրել էր, որ Հովհաննես Մարգարյանը Գյումրու ավագանու ընտրությունների արդյունքում ձեռք է բերել 4 մանդատ, սակայն օրենքը թույլ չի տալիս նրան միաժամանակ ունենալ և´ ավագանու, և´ պատգամավորական մանդատ:

Պատգամավորը չհերքեց, որ օրենքը սահմանափակում է մանդատի՝ իր լիազորությունները, և հավելեց, որ ինքը պայքարել է Գյումրու քաղաքապետի պաշտոնի համար, իսկ քանի որ ինքը չի դարձել Գյումրու քաղաքապետ, հետևաբար, որոշել է նաև պատգամավորական իր մանդատից չհրաժարվել: «Ես մասնակցել եմ քաղաքապետի ընտրությանը: Ես բոլոր շանսերն ունեցել եմ Գյումրու քաղաքապետ դառնալու համար, սակայն իմ մանդատը գողացել են, և ես հրաժարվել եմ այդպիսի մրցապայքարից ու բոյկոտել բոլոր արդյունքները: Մենք դիմելու ենք Սահմանադրական դատարան և վիճարկելու ենք այդ արդյունքները: Եվ մինչև չվերականգնվի իմ ընտրական իրավունքը, ես չեմ հրաժարվի պատգամավորական մանդատից: Այդ գողացած մանդատներից մեկը եղել է «Հայկական վերածնունիդինը», այսինքն՝ իմը, մյուսը՝ ԲՀԿ-ինը: Հիմա ո՞վ կարող է ասել, թե ումն է այդ մասնատը»,- հավելեց նա:

Իսկ թե կոնկրետ՝ ո՞վ է գողացել և ի՞նչ ճանապարհով, պատգամավորը նշեց,  որ դա պարզից էլ պարզ է. «Այն ուժը, ով տոնում է հաղթանակ: Այդ բոնուսների ու ֆոկուսների հեղինակները: Այսինքն՝ խախտվել են ոչ միայն մեր իրավունքները, այև Տեղական ինքնակառավարման մասին օրենքի 14.2 հոդվածը: Դրա համար մենք քաղաքական որոշում ենք կայացրել՝ ընդհանրապես հրաժարվել բոլոր մանդատներից: Պետք է քաղաքապետն ընտրվի ավագանու գաղտնի քվեարկությամբ: 3 քաղաքական ուժերն էլ համատեղ հայտարարել են, որ Գյումրին քաղաքապետ չունի, քանի որ գնացել խախտել են օրենքը ու հռչակվել քաղաքապետ: Ինչի՞ մասին է խոսքը»,- ասաց նա:

Հիշեցնենք, որ Գյումրու քաղաքապետի ընտրություններին հաղթանակ էր տարել «Բալասանյան Դաշինքը», որից հետո մասնակցած ընդդիմադիր 3 քաղաքական ուժերը՝ ԳԱԼԱ-ն, «Հայակական վերածնունդ»-ը և «Բարգավաճ Հայաստան» կուսակցությունները որոշում կայացրեցին բոյկոտել ընտրությունների արդյունքներն ու չմասնակցել ավագանու նիստերին: Նման որոշում էին կայացրել նաև Վանաձորի քաղաքապետի ընտրություններին մասնակցած քաղաքական ուժերը, որտեղ ԳԱԼԱ-ին փոխարինել էր պատգամավոր Էդմոն Մարուքյանի հիմնած «Լուսավոր Հայաստան» կուսակցությունը: Այստեղ քաղաքապետի թեկնածու էր դարձել իշխանական թեկնածուն: