Նախարար Ռոստոմյանն ընդունել է ՀՀ-ում Ռուսաստանի Դաշնության արտակարգ և լիազոր դեսպան Իվան Վոլինկինին

ՀՀ սպորտի և երիտասարդության հարցերի նախարար Հրաչյա Ռոստոմյանն ընդունել է մեր երկրում Ռուսաստանի Դաշնության արտակարգ և լիազոր դեսպան Իվան Վոլինկինին:

Կողմերը քննարկել են տարբեր, այդ թվում նաև՝ սպորտի և երիտասարդական քաղաքականության ոլորտներում երկու երկրների համագործակցության արդյունավետության բարձրացմանը վերաբերող հարցեր: Քննարկվել են նաև մարզական ոլորտի ներկայացուցիչների՝ մարզիչների և մարզիկների, սպորտային բժիշկների և հոգեբանների, ինչպես նաև երիտասարդ մասնագետների փորձի փոխանակման և այդ ուղղությամբ համատեղ միջոցառումների անցկացման վերաբերյալ խնդիրներ:

Դեսպան Վոլինկինը, բարձր գնահատելով Հայաստանի Հանրապետության «Սպորտային բժշկության և հակադոպինգային ծառայության հանրապետական կենտրոն» ՊՈԱԿ-ի աշխատանքը, որի շնորհիվ վերջին տարիներին հայ մարզիկները զերծ են մնացել որակազրկումից, խնդրել է նախարարին աջակցել հակադոպինգային ոլորտում հայ մասնագետների փորձը Ռուսաստանի Դաշնության մասնագետներին փոխանցելու համար: Նախարար Ռոստոմյանը հյուրին տեղեկացրել է, որ Հայաստանի Հանրապետությունում դոպինգի դեմ պայքարը լուրջ հիմքերի վրա է դրված, և այդ ուղղությամբ խիստ վերահսկողություն է իրականացվում:

«Իզուր չէ, որ 2015 թվականից Միջազգային հակադոպինգային գործակալության Արևելյան Եվրոպայի տարածաշրջանի հակադոպինգային կազմակերպությունը նախագահում է մեր երկիրը»,- տեղեկացրել է Ռոստոմյանը և խոստացել, որ կաջակցի հայ և ռուս մասնագետների համագործակցությունը կազմակերպելուն:

Կողմերը զրուցել են նաև Հայաստանում ձմեռային մարզաձևերի, մասնավորապես՝ տափօղակով հոկեյի և գեղասահքի զարգացման ուղղությամբ երկու երկրների համագործակցության հնարավոր ուղիների մասին:

Հանդիպման վերջում դեսպան Վոլինկինը նախարար Հրաչյա Ռոստոմյանին հրավիրել է մասնակցելու երիտասարդների և ուսանողների համաշխարհային 19-րդ փառատոնին, որը նախատեսվում է անցկացնել 2017 թվականի հոկտեմբերին Սոչիում: