Անկախ ընտրությունների արդյունքից` ԱՄՆ-ի և Հայաստանի միջև բարեկամական հարաբերությունները կշարունակվեն. դեսպան

Անկախ նրանից, թե ով կլինի Միացյալ Նահանգների 45-րդ նախագահը, Հայաստանի և ԱՄՆ միջև բարեկամական հարաբերությունները կշարունակվեն: Այս մասին ԱՄՆ դեսպանատանը լրագրողների հետ հանդիպման ժամանակ ասել է ԱՄՆ նախագահ Ռիչարդ Միլսը:

«Ես հավատացած եմ, որ մեր բարեկամական հարաբերություններն ԱՄՆ և Հայաստանի միջև կշարունակվեն և է՛լ ավելի կզարգանան: Մեր համընդհանուր արժեքները, ինչպես նաև ԱՄՆ կառավարության և ժողովրդի ցանկությունը՝ օգնել բոլորին ողջ աշխարհով, երաշխիք կդառնան մեր ընկերության համար»,- հայտարարել է նա:

Միլսն ընդգծել է, որ առաջիկա ժամերին շարունակելու է ուշի ուշով հետևել ընտրությունների ընթացքին՝ տեսնելու, թե ինչ է կատարվում: «Հենց հայտարարվեն պաշտոնական արդյունքները և պարզ լինի, թե ով է հաղթել, մյուս կողմը' լինի դա Քլինթոնը, թե Թրամփը, հանդես կգա ելույթով, որից հետո կսկսվի իշխանությունը փոխանցելու գործընթացը: Այդ գործողությունը սկսվի վաղը, իսկ 2017 թվականի հունվարի 20-ին տեղի կունենա նոր նախագահի երդմնակալության արարողությունը: Սա ժողովրդավարությունն է՝ գործողության մեջ: Դրանով նոր գլուխ կբացվի մեր 240 տարվա պատմության մեջ»,- հայտարարել է Հայաստանում ԱՄՆ դեսպանը:

ԱՄՆ ընտրությունների փոփոխվող տվյալներով՝ հաղթանակ է տանում Դոնալդ Թրամփը՝ ընտրիչների 276 ձայնով: