Կարծում եմ՝ միասին կարող ենք հաջողությունների հասնել. Մխիթարյանը՝ Արթուր Պետրոսյանի մասին

Այսօր, Հայաստանի ազգային հավաքականի կիսապաշտպան Հենրիխ Մխիթարյանը, ՅՈւՆԻՍԵՖ-ի կողմից ՀՀ-ում բարի կամքի ազգային դեսպան նշանակվելուց հետո, խոսեց նաև Հայաստանի հավաքականի գլխավոր մարզիչ Արթուր Պետրոսյանի մասին:

 «Արթուր Պետրոսյանն ինձ համար եղել է Հայաստանի հավաքականի պատմության լավագույն խաղացողներից մեկը, եթե ոչ՝ լավագույնը: Միշտ հպարտացել եմ նրանով: Միշտ աջակցություն եմ ստացել նրանից փոքր տարիքում:  Այս օրերին նրա հետ աշխատելով՝ մեծ տպավորություններ ունեմ, քանի որ  նա շատ լավ է հասկանում ֆուտբոլը: Կարծում եմ, որ միասին կարող ենք հաջողությունների հասնել: Ինձ համար միշտ պատիվ է այսպիսի մասնագետների հետ աշխատելը: Գիտեմ՝ նա կարող է հավաքականին ինչ-որ բան տալ»:

Իր մարզավիճակի և հավաքականի առաջիկա խաղի մասին խոսելիս՝ Մխիթարյանը հավելեց.

«Ճիշտ է՝ վերջին հանդիպումն անցկացրել եմ մոտ 1 շաբաթ առաջ՝ «Ֆեներբահչե»-ի հետ և խաղացել եմ ընդամենը 30 րոպե, սակայն դա խոչընդոտ չի կարող հանդիսանալ: Կարևորը ցանկությունն է, ոչ թե մարզավիճակը: Եթե ֆուտբոլիստն ունի ցանկություն՝ կարծում եմ, որ մարզավիճակն անցնում է երկրորդ պլան: Կփորձեմ ամեն ինչ անել, որպեսզի հավաքականին օգտակար լինեմ: Գիտեմ՝ սպասելիքները շատ մեծ են: Մոնտենեգրոյին  դեռ լավ ծանոթ չեմ: Դեռ ժամանակ ունենք ծանոթանալու և վերլուծելու նրանց խաղը»,

ԼՈւՐԵՐ.com-ի թղթակցի փոխանցմամբ՝ ասաց Մխիթարյանը: