«Հաջողվեց ֆուտբոլիստների մոտ հոգեբանական խնդիրը լուծել». Արթուր Պետրոսյանը Չեռնոգորիայի դեմ խաղից առաջ

«Մրցակիցը շատ ուժեղ է: Այս խաղի ֆավորիտն է, բայց շանսերը հավասար եմ գնահատում»,-այս մասին ԼՈւՐԵՐ.com-ի թղթակցի փոխանցմամբ, ԱԱ 2018թ.-ի ընտրական փուլի Հայաստան-Չեռնոգորիա խաղից առաջ ասաց Հայաստանի հավաքականի գլխավոր մարզիչ Արթուր Պետրոսյանը:

«Ամեն ինչ անելու ենք հաղթելու համար: Բայց ելնելով վերջին երեք խաղերի արդյունքներից՝ ամեն դրական արդյունքը մեզ առաջ կտանի: Իհարկե տանը ցանկալի է հաղթանակի հասնել»:

Խոսելով Մխիթարյանի մասին մարզիչն ասաց, որ Հենրիխի Մխիթարյանի մարզավիճակը շատ լավ է` փայլուն, իսկ տրամադրությունն էլ՝ շատ բարձր:

Հավաքականին անդրադառնալիս Պետրոսյանը նշեց, որ հիմանական կազմին  ճանաչում էր, և որ տղաները  պատրաստ են առաջիկա խաղին՝ հավելելով, որ վնասվածք ստացած Դավիթ Մանոյանը հաստատ չի մասնակցի հանիպմանը:

«Մենք շատ խնդիրներ ունենք և փորձել դրանք միանգամից լուծել՝ մեծ խնդիր կունենաք: Պետք է քայլ առ քայլ առաջ շարժվենք: Հաջողվեց ֆուտբոլիստների մոտ հոգեբանական խնդիրը լուծել: Թիմում  մթնոլորտը հանգիստ է, տղաների երեսին` ժպիտը: Վաղը նրանք ցույց կտան, որ հոգեբանորեն պատրաստ են  այս խաղին»:

Մարզիչը նաև նշեց, որ Արթուր Եդիգարյանը  իրենց տեսադաշտում է.

«Արթուր Եդիգարյանի խաղը տեսել եմ, իր հետ հանիպել, խոսել եմ: Այս խաղի համար կտրուկ շարժումենր անել պետք չէ, բայց Եդիգարյանը մեր տեսադաշտում է»:

Երկրպագուների` հավաքականի նկատմամբ թերահավատությանը անդրադառնալիս՝ մարզիչն ասաց.

«Չեմ կարծում  երկրպագուների վերաբերմունքը ճնշում է,  բայց զգացնել տալիս է:  Բայց դա երկրպագուների իրավունքն է: Երեք տարի առաջ ենք մեր վերջին տնային հաղթանակը տարել, նրանք իրավունք ունեն: Բայց կփորձենք մեր խաղով նրանց նորից հետ բերել դաշտ, որ նրանք հավատան մեզ»: