Հանրապետական «թյունինգը» շարունակվում է

Առաջիկայում ՀՀ քաղաքական դաշտը կրելու է լուրջ «վիրահատական միջամտություն»: Դերեւս հարց է, թե դա ինչ ֆորմատով տեղի կունենա, բայց մի բան ակնհայտ է. դաշտի վերաձևավորումն արդեն նշմարվում է:

Զարմանալիորեն, հիմնական զարգացումները տեղի են ունենում իշխանության սեկտորում, քանի որ նոր ներդրված ԸՕ-ը յուրահատուկ ծուղակների թնջուկ է, որի հետևանքները պարզ կդառնա առաջիկայում միայն: Ինտրիգների մեծ սիրահար Դավիթ Հարությունյանը մի յուրահատուկ սարդոստայն է հյուսել ոչ միայն քաղաքական դաշտի բոլոր խաղացողների, այլև հենց ՀՀԿ-ականների համար: Ռեյտինգային համակարգն իրականում իրենից ներկայացնում է ժամանակակից «ջունգլիների օրենքը», որտեղ կարող են պայքարել միայն ուժեղներն ու կենսունակները: Ասել է թե՝ ՀՀԿ-ի համամասնական ցուցակն օլիգարխիայի պակաս չի ունենա. հնարավոր է նաև՝ կիրառվի այլ ֆորմատ. հանրությանը հայտնի կրիմինալ և լպրծուն դեմքերը հանդես գան ֆեյք-ջահելներով, որոնք էլ իրենց տերերի կամքին ու շահերին համապատասխան՝ հետագայում կսեղմեն օրենսդրական կոճակները:

ՀՀԿ-ի դիմագծի հնարավոր պահպանման և նախընտրական յուրահատուկ բոնուս ունենալու համար, իշխանական բուրգում մտածել են յուրահատուկ պրոեկտ. քաղաքական դաշտ իջեցվեց ՀՀԿ-ի բարոյալքված դեմքի փրկիչն՝ ի դեմս Կարեն Կարապետյանի: Մարդ, ում հանդեպ հասարակությունն ունի որոշակի դրական վերաբերմունք: Անընդհատ խոսվում է նրա՝ փայլուն մենեջեր լինելու մասին, սակայն քչերն են խորանում իրականության մեջ. բանն այն է, որ «Գազպրոմ»-ի նման հարուստ և ամենակարող ընկերությունում այնքան էլ մեծ դժվարություն չէ կառավարում կազմակերպելը, և դրանով չի կարելի չափել, թե ինչ որակի մենեջեր է մարդը: Եթե հաշվենք, թե ֆինանսական ինչ պրոյեկտների ու ազատ գործունեության հնարավորություններ են եղել Կարապետյանի ձեռքի տակ, պատկերն ամբողջությամբ փոխվում է: Մի կարևոր դետալ ևս. ՀՀ գազային քաղաքականության պատասխանատուն մոտ տաս տարի եղել է Կարապետյանը, ում կառավարման ընթացքում կասկածելի հանգամաքներում առաջացել է «Գազպրոմ»-ի՝ 300 մլն դոլարի հասնող պարտքը, որը մարելու համար նույն «Գազպրոմ»-ին վաճառվեց հայկական կողմին պատկանող 20 տոկոս մասնաբաժինը, իսկ հայ իրականության մեջ ի հայտ եկան «լեվի գծերով» գազալցակայանները:

Ինչևէ, Կարապետյանն առաջիկայում ՀՀԿ-ի անդամ կդառնա: Դա թիմային հրամայական է: Նրա կուսակցականացմամբ՝ ևս մեկ անգամ կապացուցվի, որ ՀՀԿ-ն ոչ թե լուրջ գաղափարական կուսակցություն է, այլև յուրատեսակ գործակալություն կամ ուղղակի պրոֆմիություն, որին անդամակցելն ընդամենը ժամանակի և տեխնիկայի հարց է (դրա հիմքերը դրվեցին դեռևս 10 տարի առաջ, երբ ՀՀԿ-ն միանգամից գրոհեցին նրանք, ովքեր այդ պահին ցանկանում էին գոյատևել քաղաքական հարթակում): Կարապետյանի հհկ-ացմամբ՝ ողջ կուսակցությունում տեղի կունենան վերադասավորումներ: «Բարեփոխիչի» համար նախատեսվում է ստեղծել խորհրդի նախագահի պաշտոնը, որը ժամանակին Սերժ Սարգսյանը կիրառել էր սեփական ամբիցիաների համար (2006թ.-ին դարձյալ նախընտրական ՀՀԿ-ում այդ պաշտոնը ստեղծեցին ՀՀԿ-ին նոր անդամակցած Սերժ Սարգսյանի համար, որպեսզի չնեղացնեն ՀՀԿ նախագահ Անդրանիկ Մարգարյանին):

Հ.գ. Խոսելով ընտրություններից՝ դժվար է չանդրադառնալ այն ամենին, ինչ տեղի ունեցավ նախօրեին՝ արևմտյան կիսագնդում: Նախագահական ընտրություններում հաղթեց հանրապետական Թրամփը: Կարծում եմ՝ գալիք խորհրդարանական ընտրություններում հայաստանյան քաղաքական դաշտում «թրամփոտ» դեմքերի պակաս չի լինի: