«Հայաստանի հավաքականի ներուժը շատ ավելի մեծ է, քան այն արդյունքները, որոնք գրանցել է». Տումբակովիչ

«Աղետալի չի լինի միավոր կորցնելը, բայց բնականաբար այնքան էլ ցանկալի չէ միավոր կորցնել»,-այս մասին ԼՈւՐԵՐ.com-ի թղթակցի փոխանցմամբ, Հայաստան-Չեռնոգորիա հանդիպումից առաջ տեղի ունեցած ասուլիսի ժամանակ ասաց Չեռնոգորիայի հավաքականի գլխավոր մարզիչ Լյուբիշա Տումբակովիչը:

«Որակավորման սկզբից մեզ համար բոլոր խաղերը յուրահատուկ նշանակություն ունեն: Սա յուրահատուկ մինի լիգա է` բաղկացած 10 խաղից: Յուրաքնաչյուր խաղի արժեքը կայանում է երեք միավոր վաստակելու մեջ:

Այս խաղի կարևորությունը նույնքան է, որքան առաջին և սպասվելիք խաղերինը: Հայաստանի հավաքականը նախորդ խաղերում այնքան էլ լավ արդյունք չի գրանցել, բայց կարող եմ ասել, որ որոշ դեպքերում ձեր բախտը չի բերել: Նկատի ունեմ Ռումինիայի հետ խաղը, որտեղ կարմիր քարտ ստացաք և Լեհաստանի դեմ խաղը, որտեղ մեկ ժամ կրկին խաղում էիք տասը հոգով:

Հենց դա է պատճառը` Հայաստանի հավաքականի ներուժի մասին այնքան էլ իրական պատկերացում չունենք: Ուսումնասիրել ենք ձեր հավաքականը, կարող եմ ասել, որ հավաքականի ներուժը շատ ավելի մեծ է, քան այն արդյունքները, որոնք գրանցել եք: Բացի այդ, Հայաստանի հավաքականում կան թոփ մակարդակի խաղացողներ: Կփորձենք լավ խաղ ցուցադրել: Գիտենք, որ մրցակիցը ունի նոր գլխավոր մարզիչ, ունի շատ ուժեղ մոտիվացիա: Հուսով եմ, որ վաղը կտեսնենք արդար խաղ և կհասնենք մեր նպատակին: Աղետալի չի լինի միավոր կորցնելը, բայց բնականաբար այնքան էլ ցանկալի չէ միավոր կորցնել: Մենք պարտավոր չենք լավ արդյունք գրանցել, պարտավոր ենք լավ խաղ ցուցադրել և անել ամեն ինչ հաղթելու համար»,- հավելեց մարզիչը: