«Հրապարակ». Նոր հարկատեսակ

Շարքային քաղաքացու գրպանը մտնելը մեզ մոտ կարծես «հին, բարի» ավանդույթ է դառնում։ Սկզբում «Հայաստան» հիմնադրամն ու ամենամյա հեռուստամարաթոններն էին, ապա արագաչափերն ու կարմիր գծերը։ Գրում է
«Հրապարակ»-ը:

Հիմա էլ որոշել են բանակում զոհվածների եւ վիրավորների փոխհատուցման խնդիրները դնել շարքային քաղաքացիների ուսերին։ Սակայն այդ նույն քաղաքացիներին ոչ ոք չի հարցնում՝ համաձա՞յն են արդյոք մեր պետության վարած քաղաքականությանը, հսկայական պետական ապարատ, մեծաթիվ ոստիկանություն, ահռելի բանակ պահելուն։ «ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքի հեղինակների հույսը մարդկանց հայրենասիրական զգացումներն են, բանակի հանդեպ ակնածանքը, զոհվածների ու վիրավորների հանդեպ համընդհանուր կարեկցանքը։ Ըստ էության, պետությունը նոր հարկատեսակ է սահմանում, եւ բոլորովին էլ կարեւոր չէ, որ այդ գումարը կազմելու է ընդամենը հազար դրամ՝ յուրաքանչյուրից։ Կարեւորը սկզբունքն է՝ սեփական խնդիրները շարքային քաղաքացուն հարստահարելու միջոցով լուծելու միտումը, որ հետեւողականորեն ներդրվում է մեզանում։

Շատերը կխուսափեն քննադատել այս օրինագիծը՝ խնդիրը նուրբ է, եւ դեմագոգիայի պարարտ հող կա այստեղ։ Բայց ոմանք չեն վախենում արտահայտվել։ Ռազմական փորձագետ, իրավապաշտպան Ռուբեն Մարտիրոսյանը, օրինակ, ասում է․ «Ուզում եմ հարց տալ, ո՞վ է սպանում զինվորներին։ Սպանում է պետությունը։ Որովհետեւ բանակում համատարած կոռուպցիա է տիրում, սպանությունները որակվում են ինքնասպանություններ, անմեղ զինվորները հայտնվում են բերդում։ Պետությունն սպանում է զինվորին ու մեզ ասում է՝ գումարը դուք տվեք, ոչ թե դատախազը, քննիչը, ՊՆ հանցագործները եւ կոռուպցիոներները։ Հենց նրանցից է պետք վերցնել»։

Մանրամասները՝ թերթի այսօրվա համարում: