Ներկա պահին պատերազմի վերսկսման հնարավորություն չեմ տեսնում, բայց չեմ էլ բացառում. քաղաքագետ

Ես միշտ էլ ասել եմ, որ ապրիլյան պատերազմը հրահրողը եղել է Ռուսաստանը: ԼՈՒՐԵՐ.com-ի թղթակցի հետ զրույցում անդրադառնալով երեկ` Ադրբեջանում ԱՄՆ նախկին դեսպան Մեթյու Բրայզայի` լրատվամիջոցներից մեկին տված հարցազրույցին, նման տեսակետ հայտնեց քաղաքագետ Ռուբեն Մեհրաբյանը՝ նշելով, որ, եթե Ռուսաստանը թև ու թիկունք չդառնար Ադրբեջանի համար, ապա այդ քառօրյա գործողությունները չէին լինի:

Հիշեցնենք, որ իր հարցազրույցներից մեկում Մեթյու Բրայզան շեշտադրում էր կատարել, որտեղ ընդգծել էր, թե Սանկտ Պետերբուրգում ՌԴ նախագահ Վլադիմիր Պուտինի առաջարկը բավականին գրավիչ է եղել երկու կողմերի համար էլ:
Ռ. Մեհրաբյանի խոսքով, սակայն, Լեռնային Ղարաբաղի խնդրի կարգավորման գործում Ռուսաստանը, անշուշտ, ունի իր շահը և Ռուսաստանի հետ ինչ-որ բան պայմանավորվելն ու նրան հավատալը կլինի կոպտագույն սխալ.

«Ռուսաստանի հետ որևէ բան պայմանավորվել չարժե, քանի որ այդ թուղթը հետագայում ևս ոչինչ չի նշանակելու, քանի դեռ ռուսական արդի խոսքը որևէ արժեք չունի»,- ասաց նա:

Ինչ վերաբերում է ամերիկյան կողմին, և հարցին՝ ԱՄՆ-ի նորընտիր նախագահ Դոնալդ Թրամփի հետ ի՞նչ նոր զարգացումներ կարող ենք ակնկալել այստեղ՝ Ռ. Մեհրաբյանը նշեց, որ այս պահին դժվարանում է ասել՝ արցախյան խնդրի հետ կապված ինչ փոփոխություններ ամերկյան կողմը կորդեգրի, բայց կարծում է, որ ինչ-որ փոփոխություններ կլինեն:

«Լեռնային Ղարաբաղի խնդրի հետ կապված ամերիկյան կողմի դիրքորոշումը պետք է դիտարկել նաև ԱՄՆ-Եվրոպա, ԱՄՆ-Ռուսաստան, ԱՄՆ-Իրան, ԱՄՆ-Թուրքիա հարաբերությունների համատեքստում, իսկ այն, որ ԱՄՆ արտաքին քաղաքականության մեջ փոփոխություններ են լինելու, արդեն իսկ փաստ է: Ըստ այդմ էլ՝ հավանաբար, այդ հարցի հետ կապված ևս ինչ-որ տեղաշարժեր կլինեն: Կարծում եմ՝ մի որոշ ժամանակ կաշխատի իներցիան, բայց հետո, այնուամենայնիվ, ինչ-որ փոփոխություններ կլինեն»,- ասաց նա՝ նշելով սակայն, որ ԱՄՆ-ին այս պահին տարածաշրջանային խնդիրներն այդքան էլ չեն մտահոգում:

Անդրադառնալով Ադրբեջանի նախաձեռնած աննախադեպ զորավարժություններին, Ռ. Մեհրաբյանը շեշտեց՝ չի կարծում, որ այս պահին լայնածավալ պատերազմական գործողություններ սկսվեն:

«Ներկա պահին այդպիսի հնարավորություն չեմ տեսնում, բայց չեմ էլ բացառում: Այնպես չէ, որ տեսականորեն բացառվում է, բայց դա պայմանավորված է լինելու հայկական կողմի պատրատվածության աստիճանից, իսկ հայկական կողմը պատրաստ է ցանկացած տիպի ակնակնկալների: Ադրբեջանը ևս այդ մասին գիտի: Հակառակորդը շատ լավ գիտակցում է, թե ինչ կլինի, եթե անցնի պատերազմական լայնածավալ գործողությունների»,- ասաց նա:

Իսկ թե ինչ է Ադրբեջանը փորձում այս զորավարժություններով հասկացնել, քաղաքագետը ընդգծեց, որ առաջին հերթին ուզում է ասել՝ չի հրաժարվել Ղարաբաղի հարցը ռազմական ճանապարհով լուծելու իր մտադրություններից, և բանակցային գործընթացի ներկա իրավիճակը ձեռնտու չէ իրեն: «Եվ, վերջապես, հայկական կողմին ուզում է ասել՝ ոչինչ չի մոռացվել ու անելու է այն, ինչ ուզի: Այսինքն՝ սանձարձակության դեմոնստրացիա է»,- եզրափակեց նա:

 Արմինե Եփրեմյան