«Բանակի մայրն ու որդին»․ տեղի ունեցավ հուշ երեկո՝ նվիրված Արմենակ Ուրֆանյանի և ապրիլյան հերոսների հիշատակին (լուսանկարներ)

Հուզմունք, հպարտություն, արցունքներ։ Մոսկվա կինոթատրոնի մեծ դահլիճում տեղի ունեցավ Հայկական բանակի հերոս հրամանատար Արմենակ Ուրֆանյանին նվիրված հուշ երեկո և «Բանակի մայրը» ֆիլմի ցուցադրությունը։ Երեկոյին ներկա էր հերոսի մայրը՝ տիկին Համեստ Ներսիսյանը, եղբայրը, հարազատները, ԱԺ պատգամավորներ, Ուրֆանյանի սխրանքը անմահ պահող երիտասարդներ ու ապագա զինվորներ։ 

Երեկոյի սկզբում ներկաները մեկ րոպե լռությամբ հարգեցին բոլոր զոհված հերոսների հշատակը, ապա տեղի ունեցավ «Բանակի մայրը» ֆիլմի ցուցադրությունը, որի ռեժիսորը և հեղինակը Սոնա Տոնականյանն է։ Ֆիլմը նվիրված է ապրիլյան քառօրյա պատերազմում զոհված բոլոր հերոս տղաների հիշատակին, սակայն պատմում է պատերազմի հերոս, կապիտան Արմենակ Ուրֆանյանի մոր մասին: Տիկին Համեստը ցանկություն էր հայտնել գնալ Արցախ, Մարտակերտ, այն դիրքը, այն հողը, որի համար իր որդին և հերոս զինվորները իրենց կյանքը չխնայեցին։ Ուրֆանյանի մայրը եղել է այն հյուրանոցում, որտեղ կյանքի վերջին շրջանում ապրել է որդին, նստել այն մահճակալին, որտեղ քնել է իր որդին։ Մայրը սրտում անասելի ցավ ունի, բայց և հպարտ է՝ իր որդին Հերոս է, Բանակի Հերոս հրամանատար, ում սխրանքով դաստիարակվելու են գալիք սերունդները։

Հուշ երեկոյի ընթացքում ելույթ ունեցավ «Ջավախք» հայրենակցական միության նախագահ, ԱԺ պատգամավոր Շիրակ Թորոսյանը, Ուրֆանյանի դպրոցի տնօրենը, ով իր խոսքում ասաց, որ շուտով կապիտալ վերանորոգումից հետո դպրոցում կբացվի Հերոսի անունը կրող դասասենյակը և հիշատակն անմահացնող անկյունը։ 

Վերջում տիկին Համեստը ցանկություն հայտնեց խոսելու, սակայն հուզմունքն այնքան մեծ էր, որ հերոսի մայրը չկարողացավ զսպել արցունքները, հպարտության արցունքները։ Բանակի մայրը բեմ բարձրացավ իր որդու մասին խոսելու, նրան ուղեկցեցին հոտնկայս, դիմավորեցին ծափահարություններով։ Նա հերոս որդի է պարգևել Հայրենիքին։ Չէ որ, նրա որդին ու ապրիլյան պատերազմում զոհված մյուս քաջորդիները հայ ազգին պարգևեցին այս փխրուն խաղաղությունն ու պետական սահմանների ամրությունը։ Բոլորիս պարտքն է հիշել ու մեծարել, սերունդներ կրթել ու դաստիարակել այս ոգով, հայրենասիրության ոգով, որով Ուրֆանյանն իր զինվորներին էր սիրում։ Նա, հիրավի, Հայոց բանակի հերոս հրամանատարն է։ Հերոս, ով այսօր թեև մեզ հետ չէ, սակայն իր սխրանքն անմահ է։ Իհարկե, բոլորս կցանկանայինք հրաշք տեղի ունենար ու ոչ մի մայր չզգար որդի կորցնելու ցավը, անգամ Հայրենիքի սահմանները պաշտպանելիս, բայց․․․

Քրիստինա Աղալարյան

Լուսանկարները՝ ԼՈՒՐԵՐ.com-ի