«Սա հայի թասիբն էր. տղաներն այսօր հերոսություն արեցին». Արթուր Պետրոսյանն՝ առաջին հաղթանակի մասին

Հայաստանի ազգային հավաքականը՝ նորանշանակ գլխավոր մարզիչ Արթուր Պետրոսյանի գլխավորությամբ, առաջին հաղթանակը տոնեց:

Հետխաղյա ասուլիսը բարձր տրամադրությամբ ընթացավ: Մարզչին դիմավորեցին ծափահարություններով ու շնորհավորանքներով: Մարզիչն էլ իր հերթին շնորհակալություն հայտնեց լրագրողներին.

«Դուք դրական մթնոլորտ ստեղծեցիք: Ձեզ էլ շնորհակալություն»,-այս մասին ԼՈւՐԵՐ.com-ի թղթակցի փոխանցմամբ Հայաստան-Չեռնոգորիա հանդիպումից հետո ասաց Արթուր Պետրոսյանը:

Հաղթանակի մասին խոսելիս՝ մարզիչն ասաց.

«0:2-ի ժամանակ հավատում էի: Շատ հանգիստ մթնոլորտ էր, տղաներին ասացի, որ ոչինչ կորած չէ: Պետք է հավատանք, որ կարող ենք հաջողության հասնել: Ընդմիջմանը մի քանի տակտիկական ուղղումներ արեցինք: Հանգիստ մթնոլորտ էր: Բայց գոլերը դրա հետ կապ չունեին: Պետք է համեստ մնալ և քայլ առ քայլ առաջ գնալ: Փառք ու պատիվ տղաներին, իրենք այսօր հերոսություն արեցին:

Չհաշված տաս րոպեները, գոհ եմ տղաների կատարած աշխատանքից: Հակառակորդին քիչ շանս տվեցինք: 2:0 ավելի ուժ տվեց մեզ, որպեսզի տղաները ավելի  անկաշկանդ խաղան, որովեհետև այլևս կորցնելու բան չունեինք: Ցույց տվեցինք, որ եթե պետք է պաշտպանվել, կարող ենք, եթե պետք է հարձակվել, կարող ենք նաև դա»:

Այն հարցին, թե խաղից հետո ի՞նչ մթնոլորտ էր տիրում հանդերձարանում՝ մարզիչն ասաց, որ այդ պահն իր համար զգացմունքային էր և նա ցանկանում էր առանձին մնալ: Բայց հետո գնացել է հանդերձարան և շնորհավորել տղաներին.

«Շնորհավորեցի մեր հերոսներին: Շատ ուրախ մթնոլորտ էր տիրում: Սա թիմային հաղթանակ էր, այլ ոչ թե՝ Արթուր Պետրոսյանի: Սա հայի թասիբն էր»: 

Հենրիխ Մխիթարյանի խաղի մասին խոսելիս՝ մարզիչը նշեց, որ ֆուտբոլիստի մոտ մի փոքր խաղային պրակտիկայի բացակայությունը զգացվեց, բայց իր կատարած աշխատանքը մեծ է և նա շատ կարևոր է թիմի համար: