«Ես պատրաստ եմ ներողություն խնդրել». Գագիկ Մելիքյանն արդարանում է

ԱԺ ՀՀԿ խմբակցության քարտուղար Գագիկ Մելիքյանը չի հերքում, որ իր հարցազրույցներից մեկում օգտագործել է տականք բառը, սակայն նշում է, որ դա ժողովրդին վիրավորելու համար չի ասել. այն ուղղված է եղել ֆեյսբուքյան մի քանի օգտատերերի, որոնք աղավաղում են իրականությունը:

«Այն արտահայտությունները, որոնք վերագրվում են ինձ, իրականությունից բավականին հեռու են: Այդ օրը ես մի քանի անգամ այդ հարցին պատասխանել եմ և նման արտահայտություն՝ հասարակության կամ ժողովրդի հետ կապված՝ երբևէ չեմ արել, չեմ մտածել և երբևէ չեմ անելու»,-խորհրդարանում լրագրողների հետ զրույցում արդարացավ Մելիքյանը:

Հիշեցնենք, որ մամուլի հրապարակման համաձայն՝ «1000 դրամի» նախաձեռնությանը դեմ արտահայտվող քաղաքացիներին Մելիքյանը «տականքներ» էր անվանել:

«Ես հանրության կամ ժողովրդի հետ կապված նման արտահայտություն չեմ արել: Ֆեյսբուքյան մի խումբ անձանց մասին իմ արտահայտությունը չի վերաբերում ժողովրդին»,- հավելեց նա՝ պարզաբանելով, որ իր խոսքը վերաբերում է մասնավորապես նրանց, ովքեր Ֆեյսբուքում 1000 դրամների նախագծի հետ կապված ապազգային, հակապետական, հակազգային, հակահայկական, Արցախի և երկրի անվտանգության դեմ հայտարարություններ են արել: «Իմ խոսքերը մի՛ վերագրեք ժողովրդին, եթե հանրության մեջ նման ընկալում է ձևավորվել, ես պատրաստ եմ ներողություն խնդրել»,- նշեց նա:

Ինչ վերաբերում է նրան, որ իր խոսքերից հետո ֆիզիկական կուլտուրայի և սպորտի պատվավոր գործիչ, ՀՀԿ անդամ Արմեն Պապյանը կուսակցությունից դուրս գալու դիմում էր գրել ու հրապարակային նամակով հանդես եկել, Գագիկ Մելիքյանն ասաց, որ փորձում են գտնել՝ նա կուսակցության անդամ է, թե՝ ոչ, բայց առայժմ չկան տվյալներ, որ նա կուսակցության անդամ է: