Գալուստ Սահակյանը մերժեց Զուրաբյանի առաջարկը

Ազգային ժողովի ՀԱԿ խմբակցության ղեկավար Լևոն Զուրաբյանն ԱԺ հերթական քառօրյա նիստի մեկնարկին առաջարկեց զինծառայողների սոցիալական պաշտպանության ապահովման հարցը քննարկել բյուջեի շրջանակում, սակայն խորհրդարանի խոսնակը մերժեց առաջարկը:

Զուրաբյանն առաջարկում էր փոխել հերթականությունը և սկզբում քննարկել պետական բյուջեի նախագիծը, որի ժամանակ էլ կանդրադառնան նաև զինծառայողների սոցիալական պաշտպանվածության ապահովման խնդրին, որից հետո միայն քննարկել համապատասխան նախագիծը: «Մենք կողմնակից ենք, որպեսզի պետությունն ապահովի զոհված և հաշմանդամ զինծառայողների ընտանիքների փոխհատուցումը: Եվ կարծում ենք, որ այդ փոխհատուցումը պետք է լինի շատ ավելին, քան նախատեսված է փոխհատուցման վերաբերյալ նախագծով, որը ներկայացված է Ազգային ժողովի քննարկմանը: Բայց դա պետք է արվի ոչ թե քաղ աքացիներից գումարներ գանձելու եղանակով, այլ մենք կարող ենք դա անել պետական բյուջեի ծախսերի հաշվին»,-նշեց Զուրաբյանը:

Նա վստահություն հայտնեց, որ քննարկումների արդյունքում կարող են գտնել համապատասխան միջոցներ այդ խնդիրները կարգավորելու համար: «Ես առաջարկում եմ, որ մենք այս հարցը քննարկենք պետական բյուջեի շրջանակներում և փորձենք գտնել համապատասխան միջոցներ շատ կարևոր այս խնդիրը լուծելու համար»,- ասաց Զուրաբյանը:

ԱԺ նախագահ Գալուստ Սահակյանը մերժեց Զուրաբյանի առաջարկը՝ ընդգծելով, որ նման առաջարկները պետք է նախօրոք անել, ոչ թե նիստի օրակարգը հաստատելուց հետո: «Դուք ձեր տեսակետը կարող էիք ներկայացնել լիագումար նիստին նախորդող քննարկումների ժամանակ, ներկայացնեիք առաջարկներ, որը մենք կքննարկեինք, ոչ թե նիստի մեկնարկին ու օրակարգը հաստատվելուց հետո»,- հիմնավորեց Սահակյանը: