Արցախում անցկացվել է Արցախի հերոս Ռոբերտ Աբաջյանի հուշամրցաշար

Ստեփանակերտի թիվ 6 դպրոցի մարզադահլիճում անցկացվել է «ArmFighting Selection-22» ընդհանուր մենամարտերի մրցաշար, որը նվիրված էր Արցախի հերոս, «Ոսկե արծիվ» շքանշանի ասպետ Ռոբերտ Աբաջյանի հիշատակին: Հուշամրցաշարում մենամարտել են ԼՂՀ-ի և ՀՀ-ի 13-ական մարզիկներ:

Հուշամրցաշարին ներկա էր նաև պրոֆեսիոնալ «Արմֆայթինգ» ընդհանուր մենամարտերի ֆեդերացիայի նախագահ, ՀՀ սպորտի և երիտասարդության հարցերի նախարարի խորհրդական Հայկ Ղազարյանը, ով նշել է, որ ՀՀ տարբեր քաղաքներում և գյուղերում անցկացրել են նմանատիպ միջոցառումներ, և Ստեփանակերտն էլ բացառություն լինել չի կարող:

«Այս անգամ որոշեցինք, որ այս մրցաշարը կազմակերպենք Ստեփանակերտում, որպեսզի այն խթան լինի մատաղ սերնդի համար, որպեսզի, տեսնելով այս միջոցառումը, ցանկություն ունենան մարզվել այս մարզաձևով: Սա այն մարզաձևն է, որը կարողանում է մարզիկին ավելի մոտեցնել բանակին ու ինքնապաշտպանությանը: Այսպիսի մարզիկները կարող են հետագայում դիրքերում ու խրամատներում իրենց ավելի ուժեղ ու անպարտ զգալ: Մենք նաև ուզում ենք բացահայտել արցախցի լավագույն մարզիկներին, որոնք Եվրոպայի և աշխարհի առաջնություններում ոսկե մեդալներ կարող են նվաճել»,- ասել է Հ. Ղազարյանը: 

Արցախի «Արմֆայթինգ» ֆեդերացիայի գլխավոր մարզիչ Արմեն Հայրապետյանն էլ տեղեկացրել է, որ «ArmFighting Selection-22»-ին մասնակցել են Ստեփանակերտի, Երևանի, Գավառի, Էջմիածնի և Սպիտակի մարզիկները:

«Այս մրցումը երրորդ անգամ է անցկացվում Ստեփանակերտում: Մրցումը նվիրելով ազատամարտի հերոսներից Ռոբերտ Աբաջյանին, մեկ անգամ ևս ուզում ենք բորբ պահել նրա մասին մեր հիշողությունները, ասել, որ նրա հիշատակը միշտ վառ է մեր սրտում ու հոգում: Ռոբերտ Աբաջյանն այնպիսի սխրանք է գործել, որ բոլորս հպարտանալով խոնարվում ենք նրա հիշատակի առաջ: Մենք շարունակելու ենք այսպիսի մրցաշարեր կազմակերպել, հաղթել ու ի լուր աշխարհի ասել, որ մարտում հաղթանակած Ռոբերտները նաև սպորտում են անպարտելի»,- ընդգծել է Ա. Հայրապետյանը և հավելել, որ Արցախի 13 մարզիկներից 10-ը հաղթել են:

Հուշամրցաշարին հաղթող ճանաչված մարզիկներից Վահրամ Հարությունյանն իր խոսքում ասել է.

«Մենամարտում հեշտ կարողացա հաղթել. մենամարտել եմ 15 տարեկանների տարիքային խմբում: Ուզում եմ շնորհակալությունս հայտնել իմ մարզիչ Արմեն Հայրապետյանին, քանի որ նրա ջանքերի շնորհիվ է, որ ես հաղթել եմ այս մրցաշարու: Շնորհակալությունս եմ հայտնում նաև Հայաստանի «Արմֆայթինգ» ընդհանուր մենամարտերի ֆեդերացիայի նախագահին, որ նման միջոցառում է կազմակերպել, որին կարողացա մասնակցել նաև ես: Մինչ այսօր չորս մենամարտ եմ անցկացրել. չորսն էլ ավարտվել են հաղթանակով»:

Հայաստանի թիմի անդամ Արման Գրիգորյանի կարծիքով էլ՝ հուշամրցաշարում կարևորը հաղթանակը չէր, այլ այն, որ մրցաշարը նվիրված է Ռոբերտ Աբաջյանի հիշատակին. «Այս առումով այն տարբերվում է մնացած մրցաշարերից: Այս մարտին լավ էի նախապատրաստվել և հաղթեցի: Երկու տարուց ավելի է, ինչ մարզվում եմ. հուսամ' դեռևս շատ հաջողությո ւնների եմ հասնելու»:

Մրցաշարում հաղթող ճանաչված մարզիկները պարգևատրվել են պատվոգրով, մեդալով և գավաթով: