Սեյրա՛ն ջան, դու գեներալ մարդ, կռված մարդ, կուլտուրական մարդ. ես ու Լյովը կարող ա չիմանանք, դու չգիտե՞ս՝ ովքեր են բանակից գողացողները. Արամ Մանուկյան

ԱԺ-ում շարունակվում է զինծառայողների կյանքի և առողջության համար փոխհատուցման նախագծի քննարկումը: Նախագծի քննարկմանը ելույթ ունեցավ նաև ՀԱԿ խմբակցության քարտուղար Արամ Մանուկյանը, ով մատնանշեց այն գումարները, որոնք հնարավոր է ուղղել բանակի խնդիրների լուծմանը: «Այն, որ պետությունը բանակի խնդիրները պետք է լուծի, քննարկման ենթակա չէ: Առարկությունը միջոցների ընտրության մեջ է»,- ասաց նա:

Նա շեշտեց, որ պարտադրանքով հնարավոր չէ որևէ լավ բանի հասնել, իսկ նման հարցերը սովորաբար պետք է կամավոր սկզբունքով լինեն. «Տասն անգամ ավելի շատ գումար է հնարավոր հավաքել, քան նախատեսում է հիմնադրամը: Ես սիրում եմ խոսել թվերով. տարեկան Հայաստանից դուրս է գալիս 1,5 միլիարդ դոլար ապօրինի կանխիկ փող: Հարգելի ԱԱԾ, հարգելի կառավարություն, իմ ասածը պե՞տք է ստուգվի, թե՞ չէ, մեկը պե՞տք է հերքի այս հայտարարությունը, կամ՝ հաստատի: Մեր աղքատ ու սոված երկրում կա 5 միլիարդատեր, 60 միլիոնատեր: Նման աղքատ երկրում կարճ ժամանակում օրինական միջոցներով չեն հարստանում: Մեր երկրում նվազագույնը 40 տոկոս ստվեր կա, որը ստվերից հանելու դեպքում 1 միլիարդ դոլար կբերեիք բյուջե: Էս երկրում դատախազությունը պե՞տք է գործի, թե՞ չէ: Սեյրանին եմ խոսքս ուղղում. Սեյրա՛ն ջան, դու գեներալ մարդ, կռված մարդ, կուլտուրական մարդ: Ես ու Լյովը կարող ա չիմանանք՝ բանակում ինչ ա կատարվում, դու չգիտե՞ս՝ ովքեր են բանակից գողացողները: Եթե գիտես՝ Աստվա՞ծ պետք է պատժի էդ գողացողներին: Տերտերը կարող է այդպես ասել, բախտ բացողն ասել, բայց էսպես երկիր չեն կառուցում»,- դիմելով Սեյրան Սարոյանին, հայտարարեց պատգամավորը:

Նա առաջարկեց նաև կրճատել ոստիկանության թիվը և խնայել գումար բյուջեում, քանի որ Հայաստանի նման փոքր երկրում նման քանակի ոստիկանությունն արդարացված չէ:

«Դու քո միլիոնը պահում ես, ուրիշի 1000 դրամն ես պահանջում, էստեղ է անբարոյականությունը, սա մուրացկանություն է: Փոքր, մի բուռ ազգ ենք, հազար ու մի միջոց կա գումարները հետ բերելու, Գագիկ Խաչատրյանի կառուցած ուսումնական կենտրոնը պետականացրեք ու տվեք զինվորին: Մարդու արժանապատվությունը հարգե՛ք, ո՛չ թե պարտադրեք նրան: Մարդը ուղարկել է իր երեխային բանակ, աշխատում է ու հարկեր է տալիս, գնա տասնապատիկ շատ անգամ ավել լուծի զինվորի հարցը»,- նշեց Արամ Մանուկյանը:

«Հայաստաննն ունի հարյուր հիսուն գենարալ: Պարզ հաշվարկով՝ քսան հազար բնակչին ընկնում է մեկ գեներալ, այն դեպքում, երբ ԱՄՆ-ում երկու հարյուր ութսունհինգ հազար բնակչին մեկ գեներալ է հասնում: Հայաստանում գեներալների քանակն ավելին է. հասկանում եմ՝ նրանք լավն են, հզոր են, բայց Հայաստանը չի կարող տասն անգամ ավել գեներալ ունենալ: Սա հարյուր միլիոն դոլարի չափով արտաբյուջետային լրացուցիչ միջոցներ է պահանջում: Ռազմական դրություն հայտարարեք, որ մարդիկ իմանան՝ այս գողացված փողերը էլ չեն գողանալու: Մենք լուծում ու այլըտրանք ենք առաջարկում, պե՞տք է այդ թալանված փողերը վերցնեք, թե՞ ոչ: Սա մուրացկանություն է: Այնքան միջոց կա այս երկիրը շտկելու, որոնք բաց ու տեսանելի են, իսկ սա մուրացկանություն է»,- հայտարարեց պատգամավորը:

Նա ևս օրինակ բերեց ՀՀ ֆինանսների նախկին նախարար Գագիկ Խաչատրյանի օրինակն ու շեշտեց, որ Հայաստանում այսօր մի քանիսն ունեն երկու հարյուր հիսուն հազար դոլարանոց դղյակներ, այն դեպքում, երբ բանակն ունի փողի կարիք: «Գագիկ Խաչատրյանը, որ քառասուն միլիոնանոց դղյակ է սարքել, դա՛ պետականացրեք ու տվեք զինվորին: Սովետի հոտ ա գալիս, մեր կռիվը սա՛ է: Միջոցը գտե՛ք, թե չէ այս ձևով ամենալավ գաղափարը՝ հումանիզմը, փչացնում եք: Սովետի հոտ է գալիս, սովետի՛»:
Պատգամավորի խոսքով՝ այսօր պաշտոնյաների մեծ մասը հսկայական գումարներ է վատնում անձնական «ախրանա» պահելու համար: «Ախրանա եք պահում, ինչի՞ համար, ումի՞ց եք վախենում: Հաշվարկեք՝ այդ զենքը, ֆինանսը ուղարկեք բանակ: Հազար դոլարանոց ախրանան ո՞ւմ է պահելու, եթե սահմանում կռիվ լինի: Եթե ախրանան Ձեր տներն է պահում, էդ ումի՞ց, Բաստիլ է, ինչ է: Հայաստանում կա գրանցված ընդամենը տանհինգ տուն, որոնք երկու հարյուր հիսուն հազար դոլարից ավելի են գնահատված: Սա կադաստրավորվել է, որպեսզի այդ մարդիկ գույքահարկ չմուծեն: Եթե գույքը հավաքեք, կտեսնեք, թե ինչքան գումար կհավաքվի: Պարզ է, որ կեղծիքի դեմ չեն ուզում պայքարել, դրանք մաքրել, ու ասում են՝ ամոթ նրան, ով հազար դրամ չի տալիս»,- եզրափակեց նա: