«Միասնություն» շարժման շուրջ հավաքվել են ազգային հենքով երիտասարդներ

Օրերս տեղի ունեցավ «Միասնություն» համազգային շարժման առաջին համաժողովը, որի ընթացքում ելույթ ունեցավ Շարժմանը միացած «Հայազն» կուսակցության վարչության անդամ Սոնա Կարապետյանն, ում ելույթը ներկայացնում ենք ստորև.

«Անկախության տարիներից ի վեր, «Միասնությունը» եղել է բոլորիս երազանքը, և այսօր մի խումբ հայրենասեր գաղափարակիցների շնորհիվ այդ երազանքն ի կատար ածվեց: Այս տարիների ընթացքում մեր սերունդն ականատես է եղել տարբեր շարժումների՝ կուսակցությունների ու նախաձեռնությունների միավորմանը, որոնց նպատակն է եղել իշխանափոխությունը, և որոնք, ցավոք, հաջողության չեն հասել: Շատերն իրենց ձախողումների մեջ մեղադրում են ժողովրդին՝ արդարանալով, որ եթե ժողովուրդը համախմբվեր, մենք վաղուց կապրեինք ավելի լավ Հայաստանում:

Կարծում եմ` արդար չէ սեփական անհաջողությունների մեջ մեղադրել Սարդարապատում և Արցախյան ազատամարտում հաղթած ժողովրդին: Ժամանակն է, վերջապես, ընդունել, որ այդ ձախողումների միակ պատճառն ընդհանուր նպատակի ու ազգային գաղափարի բացակայությունն է, առանց որի` ցանկացած շարժում դատապարտված է:

Սա ոչ թե քննադատություն է, այլ ինքնաքննադատություն, քանի որ մենք՝ ներկա գտնվողներից շատերս, որպես ժողովրդի մի մաս, նույնպես մասնակցել ենք տարբեր շարժումների, և չնայած մեր երիտասարդ տարիքին, կանգնել ենք առաջնագծում և լոկալ պայքարներում ունեցել ենք փոքր, բայց կարևոր հաղթանակներ, սակայն վերջնական արդյունքի չենք հասել:

Այսօր, «Միասնություն» շարժման շուրջ հավաքվել են ազգային հենքով երիտասարդներ, իրենց մասնագիտություններում հմտացած անհատներ, ովքեր իրենց առջև նպատակ են դրել հայաստանյան քաղաքականության մեջ իրականացնել սերնդափոխություն, և այս նպատակին հասնելու առաջին քայլը 2017թ.-ի ապրիլի 2-ին կայանալիք խորհրդարանական ընտրություններին մասնակցությունն է:

Չգիտեմ, ճակատագրի հեգնանք համարեմ, թե պատահականություն, չնայած քաղաքականության մեջ պատահականություններ չեն լինում, բայց ինչպես երևում է, ապրիլի 2-ը hայ ազգի համար ճակատագրական օր դարձավ:

Այս տարի` ապրիլի 2-ին, Արցախում ակտիվացան պատերազմական գործողությունները, որի արդյունքում ունեցանք անդառնալի մարդկային կորուստներ, ինչպես նաև՝ տարածքային կորուստներ: Թշնամին մնում է թշնամի, նա անում է իր սև գործը, բայց այն դեպքում, երբ հնարավորություն կար ետ պահել մեր տղերքին մահից, մեր ռազմական ու քաղաքական գործիչները կարևոր գործերով բիլիարդ էին խաղում: Դա խոսում է այն մասին, որ կադրերը ճիշտ ընտրված չէին, և առ այսօր ոչ ոք իր տեղում չի գտնվում:

Ամեն ինչ սկսվում է կրթության համակարգից… Երբ երիտասարդները գումարով են ընդունվում ռազմական ինստիտուտ, ոստիկանության ակադեմիա, բժշկական համալսարան և այդպես էլ ավարտում են ԲՈՒՀ-երը, գումարով քննություն ստանում, դիպլոմներ գնում, և հետո էլ կաշառքով անցնում աշխատանքի այս կամ այն պաշտոններում, էլ ի՞նչ որակյալ համակարգի և անվտանգության մասին կարող է խոսք գնալ:

Սերնդափոխություն ասելով՝ նկատի չունենք համակարգն ուղղակի երիտասարդ կադրերով համալրել: Բնական սերնդափոխությունը լինելու է իսկապես հայրենասեր, պրոֆեսիոնալ և գործի նվիրյալ, պետականամետ երիտասարդ գործիչների համակարգ մուտք գործելով:

Եվ ինչպես այս տարվա ապրիլի 2-ին հայ ժողովուրդը միասնական ցույց տվեց իր բռունցքը, այդպես էլ 2017թ.-ի ապրիլի 2-ին ԱԺ ընտրություններին կկայացնի ճիշտ որոշում, և այդ որոշման հենարանը կլինի «Միասնություն» համազգային շարժումը»: