Կուրուվում կայացել են հայազգի նշանավոր գործիչ Գժեգոժ Պիրամովիչի հիշատակի միջոցառումներ

Լեհաստանի Կուրուվ քաղաքում նոյեմբերի 14-ին տեղի են ունեցել Լեհաստանի պատմության նշանավոր գործիչներից մեկի՝ Լեհաստանի կրթության նախկին նախարար, բանաստեղծ, հոգևորական, Լեհաստանի՝ բարձրագույն «Սպիտակ Արծիվ» շքանշանի ասպետ, հայազգի Գժեգոժ Պիրամովիչի (Փիրումյան) մահվան 215-րդ տարելիցին նվիրված միջոցառումներ: Գժեգոժ Պիրամովիչը նաև հանդիսանում է Լեհաստանի առաջին Սահմանադրության տեքստի համահեղինակներից մեկը: Այս մասին տեղեկանում ենք ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից՝ հավելելով. «Միջոցառումներին մասնակցելու նպատակով Կուրուվ ժամանած՝ Լեհաստանում ՀՀ դեսպան Էդգար Ղազարյանը, Կուրուվի վույտ (համայնքի ղեկավար) Ստանիսլավ Վոյչիխը, տեղական իշխանությունների այլ ներկայացուցիչներ, քաղաքի բազմաթիվ մտավորականներ մասնակցեցին Գժեգոժ Պիրամովիչի հիշատակին մատուցված Սուրբ պատարագին: Ներկաներին ուղղված իր խոսքում ՀՀ դեսպանը նշեց, որ հպարտություն է ապրու մ' իմանալով հայազգի նշանավոր գործիչների՝ Լեհաստանի պատմության մեջ ունեցած ակնառու և բացառիկ դերակատարության մասին, որոնց թվին է դասվում նաև պետական, հասարակական և կրոնական գործիչ Գժեգոժ Պիրամովիչը:

Այնուհետև, դեսպան Ղազարյանը և Կուրուվի վույտ Ստանիսլավ Վոյչիխը ծաղիկներ են զետեղել և հարգանքի տուրք մատուցել Գժեգոժ Պիրամովիչի և նրա մոր՝ եկեղեցու բակում զետեղված հուշատախտակների առջև:

ՀՀ դեսպանը Կուրուվի վույտի ուղեկցությամբ այցելել է նաև քաղաքի թանգարան, որտեղ ներկայացված ցուցանմուշներն առավելապես վերաբերում են Գժեգոժ Պիրամովիչի կյանքին և գործունեությանը»: