«Ամոթ է, մենք պետք է բոլորս դեմ քվեարկենք, որովհետև այս մոտեցումն անարդար է». Զարուհի Փոստանջյան

ԱԺ պատգամավոր Զարուհի Փոստանջյանը շարունակում է մնալ այն կարծիքին, որ բանակի անվան տակ քաղաքացիներից հազար դրամ հավաքելը մուրացկանություն է:

ԱԺ-ում նա հայտարարեց, որ օրենքը հանրությունն ընկալում է իբրև մուրացկանություն, իսկ եթե խոսում են ազգային տուրքի մասին, ապա այն չի կարող լինել բոլորի համար ընդամենը հազար դրամ:

«Հայոց արքունիքի կանայք, երբ պետք էր լինում ժողովրդին պաշտպանել, պատերազմին մասնակցել, իրենց թանկարժեք զարդերը հանում ու դնում էին սեղանին: Նորանշանակ նախարարի տիկինը դարձել է միլիոնատեր: Ու հիմա նա էլ պիտի վճարի 1000 դրամ, բնակչության աղքատ խա՞վն էլ: Սա ազգային տուրք չէ, մուրացկանություն է: Ամոթ է, մենք պետք է բոլորս դեմ քվեարկենք, որովհետև այս մոտեցումն անարդար է: Տոհմիկ կանայք թող բերեն՝ սեղանին դնեն իրենց միլիոնավոր դոլարների զարդերը»,- հայտարարեց պատգամավորը:

Նա կոչ արեց այսպիսի մոտեցումներով հանդես չգալ և հավելեց, որ օրինագիծը չի տարածվելու մասնավորապես նրանց վրա, ովքեր մահացել են ոչ հակառակորդի գնդակից, այլ՝ կարգապահական նորմերի խախտումից, և այլն: «Իսկ ո՞վ գիտի՝ այդ դեպքերը ինչպես են տեղի ունենում: Պարզ չի՝ սպանությունները ոնց են լինում: Գործեր կան՝ դատական համակարգերում տարիներով պտտվում են, մեղադրյալներ չկան: Խոսում եք բարոյականությունից, բայց չստեղծեցիք հանձնաժողով, որ այդ դեպքերը բացահայտվեն ու այդ դո՞ւք էիք բարոյականը, թե հանրությունը, որ քննադատում է»,- ընդգծեց Փոստանջյանը:

Պատգամավորն ասաց, որ զինվորներին 4000 դրամ սահմանված գումարներն անգամ չեն տրվում, նրանք ստորագրում են, բայց տեղ չեն հասնում: Ամբողջությամբ, ըստ պատգամավորի, տեղ չեն հասնում նաև «տուլիկները»:

ԱԺ փոխնախագահ Էդուարդ Շարմազանովն էլ հորդորեց նման խախտումների մասին տեղեկացնել դատախազությանը, Պաշտպանության նախարարությանը, հակառակ դեպքում՝ առանց փաստերի խոսելն անհիմն է:

«Դուք այստեղ զբաղված եք մարդկանց վարկաբեկելով: Եթե կա փաստ անօրինականության մասին, ներկայացրե՛ք: Հերիք ա ասեք՝ դուք չգիտեք, չգիտեք… Ներկայացրեք, հակառակ դեպքում սուտ վկայություն եք տալիս, մտցնում ենք բոլորին փակուղի: Իմացե՛ք ձեր խոսքի արժեքը»,-ասաց ԱԺ փոխնախագահը։