Անտառտնտեսության թաղամասի 37 ընտանիք մեկ շաբաթ է՝ ջուր չունի. Եղվարդի քաղաքապետարանն անգործության է մատնված (լուսանկարներ)

Եղվարդի Անտառտնտեսության թաղամասի բնակիչները բողոքում են, որ ավելի քան մեկ շաբաթ է՝ ջուր չունեն: Թաղամասի 37 ընտանիք չի կարողանում կազմակերպել կենցաղը: Ջրազուրկ Անտառտնտեսության մասին գիտեն ջրմուղկոյուղում, բայց դրանից ոչինչ չի փոխվել: Ստեղծված անելանելի դրության մասին տեղյակ են Եղվարդի քաղաքապետարանում, սակայն անգործության են մատնված: Այդ թաղամասում խնդիրները բազմաթիվ են, սակայն դրանցից ոչ մեկը լուծում չի ստանում:

«Ասում են՝ 1 ժամից կլինի, մի քիչ հետո զանգեք՝ կասենք, վթար ա եղել, վթարը վերացնենք՝ կլինի: Ինչքա՞ն կարող ենք անջուր մնալ, սա 21-րդ դարին հարի՞ր վիճակ է»,- բողոքում են բնակիչները:

ԼՈւՐԵՐ.com-ը խնդրի մասին պարզանբանումներ ստանալու համար կապ հաստատեց Եղվարդի փոխքաղաքապետ Կարեն Հարությունյանի հետ:

Վերջինս նշեց, որ վերջին մի քանի օրերին ջրամատակարարման հետ կապված ընդհատումներ եղել են, բայց որ բնակիչներն ընդհանրապես ջուր չեն ունեցել, նման բան իրենք չեն իմացել:

«Որ թաղամասում 1 շաբաթ ջուր չի եղել, նման խնդիր չկա: Եղել է նախապես զգուշացված ջրանջատում, որից հետո խցանում է եղել: Թաղամասը 35 տուն է, 3.5 լ/վ ջուր է մտնում, որը բավարար է բոլորին , բայց կա 7 տուն, որ այս պահին ջուր չի ստանում: «Երևան ջուր»-ը աշխատանքներ է տանում դրա համար, կարծում եմ՝ մինչև երեկո այդ հարցը կարգավորված կլինի: Հիմա աշխատանքներ են տարվում, - ասում է Եղվարդի փոխքաղաքապետ Կարեն Հարությունյանը:

Ինչպես նշեց փոխքաղաքապետը, Անտառտնտեսություն թաղամասը ջուր ստանում է Նոր գեղի «Եղվարդ» ջրագծից: Ժամանակ առ ժամանակ լինում է, որ ջրամբարի հետ կապված խնդիրներ են լինում, Եղվարդը երկու կողմից է սնվում՝ Ապարանի ջրամբարից և Նոր գեղի պոմպակայանից»:

Սոնա Հարությունյան