«Այն ձեռքը, որ գնում է դեպի բյուջե, այդ ձեռքը պետք է կտրվի». Վահրամ Բաղդասարյան

ԱԺ-ում քննարկվող թեժ թեմաներից մեկն էլ ՀՀԿ խմբակցության պատգամավոր, գեներալ Սեյրան Սարոյանի երեկվա ելույթն է: Վահրամ Բաղդասարյանից լրագրողները հետաքրքրվեցին՝ գլխավոր դատախազությունն արդյո՞ք պետք է Սեյրան Սարոյանի կողմից արված հայտարությունները հանցագործության մասին հաղորդում ընդունի, որին ի պատասխան՝ Բաղդասարյանն արձագանքեց.

«Որ երևույթը կա, միանշանակ, բայց ես ծանոթ չեմ պաշտպանական ոլորտի ներքին խոհանոցին: Չնայած՝ ինձ թվում է, որ պատկան մարմինները, համապատասխան մարմիններն այդ երևույթները պետք է բացահայտեն, որպեսզի հանրության համար ամեն բան պարզ լինի: Եթե կան չարաշահումներ, ապա դրանք պետք է մատուցվեն հանրությանը: Եվ այդ չարաշահումներ կատարողները պետք է պատժվեն օրենքի ամբողջ խստությամբ: Իսկ այն բոլոր վնասները, որոնք որ թույլ են տրվել, պետք է հատուցվեն: Երևույթն անթույլատրելի է ոչ միայն պաշտպանության նախարարության խնդիրներում, այլ բյուջեի հետ կապված խնդիրներում: Եվ այն ձեռքը, որ գնում է դեպի բյուջե, այդ ձեռքը պետք է կտրվի»:

ՀՀԿ խմբակցության ղեկավարը միևնույն ժամանակ գտնում է, որ հարցի հասցեատերն ինքը չէ: Նա նշեց, որ ինքն իրավաբան չէ, բայց գտնում է, որ հետևություններ անելը պարտադիր է: «Եվ ինչո՞ւ միայն Սյրան Սարոյանը, երեկ ամբիոնի մոտից մի քանի տասնյակ պատգամավորներ հայտարարություններ արեցին: Նախարարն արդեն իսկ ասում է, որ ուսումնասիրում են, և եթե կլինեն փաստեր, ապա պետք է հարուցվեն գործեր, քննություն գնա և հատուցվեն բոլոր վնասները, որոնք որ կատարվել են»,- ընդգծեց նա:

Անդրադառնալով զինծառայողների և նրանց ընտանիքների սոցիալական պաշտպանության համար ստեղծվող հիմնադրամը քննադատողների հայտարարություններին՝ պատգամավորը նշեց, որ նմանատիպ օրենքը որևէ աղերս չունի այն բոլոր արտահայտությունների, ելույթների հետ, որոնք այսօր հնչում են: «Սա այն հարցը չէ, որը պետք է աղավաղվի: Սոցցանցերում ինչ-որ տարբեր մեկնաբանություններ են անում: Սա շատ լավ, բարի նպատակով բերված օրենսդրական փաթեթ է, ազգի միասնության և համախմբման մի նախաձեռնություն, որտեղ յուրաքանչյուր ընտանիք ասում է, որ պատերազմն իրենն է: Չկա մի հայ ընտանիք, որ չասի այդ տողերը, իսկ այս նախաձեռնության միջոցով յուրաքանչյուր ոք մասնակցություն է ունենում թեկուզ հազար դրամով, հնարավորության տեր մարդիկ՝ ավելի շատ գումարով: Պատերազմը մերն է, բոլոր զոհվածները՝ նույնպես»,- ասաց նա:

Դիտարկմանը՝ բանակի մի շարք պաշտոնյաներ, կամ, առհասարակ՝ պաշտոնյաներ, դղյակներ ունեն, հնարավո՞ր չէ այս դղյակների հաշվին օժանդակել վիրավոր ու զոհված զինծառայողների ընտանիքներին, Բաղդասրայնն ավելացրեց, թե որևէ մեկին չի կարող քննադատել: «Ես դեմ չեմ, որ մարդիկ ունենան լավ տներ, դղյակներ կամ հարստություն: Բայց թե ինչ ճանապարհով են ստեղծել այդ դղյակներն ու հարստությունները, այ, սա՛ է հարցը: Այդ իսկ պատճառով այդ հարցերին պետք է պարզաբանումներ տրվեն»,- հավելեց նա:

Հակադարձմանն՝ ինչ է՝ Աստվա՞ծ պետք է պարզաբանում տա, Բաղդասարյանն արձագանքեց. «Ես հավատացյալ մարդ եմ: Եղել են շատ դեպքեր, որ նման ձևով ձեռք բերված հաջողություններն ավելի խիստ են պատասխան տվել և, ցավոք սրտի, ընտանիքի անդամներով են պատասխան տվել: Աթեիստ չեմ, հավատացյալ եմ, բայց ավելի օբյեկտիվ, և ինձ թվում է, որ բոլոր գործերը չէ, որ պետք է Աստծուն թողնենք: Ցավում եմ նաև, որ մեր հավատացյալները, երբ որ տեղները նեղ է լինում, նոր են Աստծուն դիմում ու խաչակնքվում: Լավ ու լայն վիճակում էլ մենք պետք է հիշենք Աստծուն: Իսկ այն գործերը, որ մենք պետք է անենք, չպետք է թողնենք Աստծուն: Դրա համար պատկան մարմինները պետք է զբաղվեն այդ գործերով: Ինձ թվում է՝ այն բարդ խնդիրներից մեկը չէ:

Ապրիլյան պատերազմից հետո եղան ուսումնասիրություններ, եղան ազատումներ: Այդ գործը չի քնեցվել, այդ գործը շարունակվում է, և կարծում եմ, որ դեռ կլինեն բացահայտումներ: Բայց ընդամենը երկու նախադասություն կասեմ, որ ընկալելի կլինի ձեզ համար:

Եթե վերջին զորահանդեսը դուք տեսաք, որը համեմատեք մեր բյուջեի հետ, բոլորին հասկանալի կլինի, որ դա մեր բյուջեի շրջանակում չէ: Եվ փակե՛նք այդ խոսակցությունը»,- եզրափակեց ԱԺ ՀՀԿ խմբակցության ղեկավարը: