Պայքար, որը միտված է կրթական համակարգի փոփոխություններին

Մոտ 10-15 օր առաջ ձևավորված «Մենք ենք» ուսանողական շարժումն արդեն մի քանի օր է, ինչ պայքար է սկսել, որը միտված է ընդհանուր կրթական համակարգի փոփոխություններին:

ԼՈՒՐԵՐ.com-ի թղթակցի հետ զրույցում «Մենք ենք» ուսանողական շարժման խմբի ղեկավար Աղվան Պողոսյանը նշեց, որ արդեն ունեն նախաձեռնող խումբ, իրենց պայքարը լայն արձագանք է ստացել և ուսանողների, և դասախոսապրոֆեսորական անձնակազմի կողմից:

«Մոտակա ժամանակում մեր առաջարկները հրապարակավ կներկայացնենք վարչապետին և ԿԳ նախարարին»,- ասում է «Մենք ենք» ուսանողական շարժման խմբի ղեկավար Աղվան Պողոսյանը:

Աղվան Պողոսյանի խոսքով՝ պահանջելու են նաև, որպեսզի բոլոր ԲՈՒՀ-երը, որոնք վարկային գիծ ունեն բանկային համակարգի հետ, հրապարակավ ներկայացնեն վերջին տարիներին իրենց գործունեությունը, թե ինչի համար է վերցվել գումարը, դրան զուգահեռ՝ ինչի՞ է բարձրացել ուսման վճարը, և ու՞ր են գնացել գումարները: Եթե տեղի է ունեցել գողություն, ո՞վ է պատասխան տալու:

Հարցին՝ ինչ են պատրաստվում անել, եթե կառավարությունը համապատասխան ընթացք չտա, Աղվան Պողոսյանը պատասխանեց.
«Կօգտվենք օրենքով մեզ տրված բոլոր հնարավորություններից, այսինքն՝ կտեղափոխվենք փողոցային պայքարի»:

Աղվան Պողոսյանն, անդրադառնալով փոփոխություններին, ասաց, որ փոփոխություններ պետք է տեղի ունենան որակական առումով, պետք է իջեցնել ուսման վարձերը, որը 10 անգամ գերազանցում է նվազագույն աշխատավարձի շեմը: Այսինքն՝ գործող իշխանությունը մտածում է, որ երիտասարդությունը չունենա հնարավորություն սեփական երկրում կրթվելու: Պետք է իրականացվի դասախոսապրոֆեսորական աշխատակազմի վերապատրաստում: Նրա կարծիքով՝ այսօր գրեթե բոլոր ԲՈՒՀ-երում կուսակցականացված վիճակ է: Այսինքն, գործող քաղաքական թևի կադրերը տեղավորվում են բուհական համակարգում: Այսօր շատ դասախոսներ իրենց գիտելիքներն արդեն փորձում են տրամադրել օտար երկրներում, որը նաև լայն հիմք է արտագաղթի համար:

Փոփոխությունները պետք է վերաբերեն նաև ուսանողական կառույցներին, խորհուրդներին, քանի որ դրանք ստեղծվել են հենց ուսանողների շահերը բարձրաձայնելու համար, ունեն 25 տոկոս ձայնի իրավունք, և գրեթե ոչ մեկի մոտ չկա այդ գործառույթը:

Սոնա Հարությունյան