«Այս կառավարությունն էլ, նախորդի նման՝ լատարե է». Փաշինյան

ԱԺ ՀԱԿ խմբակցության պատգամավոր Նիկոլ Փաշինյանն անհանգստացած է, թե ինչու բյուջեի նախագծի քննարկմանը չի ներկայացել վարչապետ Կարեն Կարապետյանը:

«Ինչո՞ւ գոնե վարչապետ Կարեն Կարապետյանը ներկա չէ: Վարչապետը, Սահմանադրության 80-րդ հոդվածի համաձայն, պիտի այստեղ նստած լիներ, այլ ոչ թե մի ուրիշ տեղ»,- ԱԺ-ում 2017 թվականի պետական բյուջեի նախագծի քննարկմանը ֆինանսների նախարար Վարդան Արամյանից հետաքրքրվեց նա:

Արամյանը կրկնեց, որ վարչապետը չի կարող միաժամանակ և՛ գործուղման մեկնել, և՛ ԱԺ նիստին ներկա լինել:

Հիշեցնենք, որ Կարեն Կարապետյանը պաշտոնական այցով գտնվում է Ռուսաստանի դաշնությունում:

Պատգամավորն արձագանքեց, որ ֆինանսների նախարարների ելույթներից տպավորություն է ստանում, որ նախորդ Կառավարության նման, այս կառավարությունն էլ «լատարեի» նման բան է:

«Տրանսֆերտները կաճե՞ն, թե՞ կնվազեն, սփյուռքահայ մեծահարուստները մի 200 միլիոն նվեր կտա՞ն, թե՞ չեն տա։ Եթե կտան, կապահովենք, եթե ոչ՝ կկտրենք»,- հեգնեց պատգամավորը, որի դիտարկումները դուր չեկան ֆինանսների նախարարին:

Վարդան Արամյանն էլ իր հերթին հայտարարեց, որ Կառավարության անելիքները, տարբերությունները նշված են ծրագրում, ըստ որի՝ արդյունաբերության աճի համար հիմքեր են ստեղծում:

«Մենք պետք է դնենք այնպիսի գործիքակազմ, որ տնտեսությունն ի վիճակի լինի այդ տնտեսական աճն ապահովել»,-ասաց նա:

Նիկոլ Փաշինյանը հետաքրքրվեց նաև Հյուսիս-հարավ ավտոճանապարհի կառուցապատման աշխատանքներից և ընդգծեց, թե Երևան-Աշտարակ հատվածը պաշտոնապես բացվել է, բայց հիմա փակ է, և ծաղկեպսակների թիվը շատանում է, քանի որ մարդիկ այդ ճանապարհին մահանում են:

Վարդան Արամյանն ասաց, որ Հյուսիս-հարավի գաղափարախոսությունը տարանցիկ զոնա դառնալն է, որը պետք է բերի տնտեսական զարգացման:

«Բայց Ձեր մտքի թռիչքը ես չեմ կարողանում հասկանալ, հարցն այն է, թե այդ ճանապարհը կարևո՞ր է, թե՞ ոչ։ Այո, այն կարևոր է մեր տնտեսության համար»,-նկատեց Արամյանը: