ՀՀ ոստիկանության անձնագրային և վիզաների վարչության պետը Skype-ով պատասխանել է հայրենակիցների հարցերին

ՀՀ ոստիկանության անձնագրային և վիզաների վարչության պետ, ոստիկանության գնդապետ Մնացական Բիչախչյանը նոյեմբերի 22-ին Skype-ի միջոցով պատասխանել է հայրենակիցներին հետաքրքրող հարցերին, որոնք վերաբերել են, մասնավորապես ՀՀ քաղաքացու անձնագիր ստանալու ընթացակարգին: Այս մասին տեղեկանում ենք ՀՀ ոստիկանության պաշտոնական կայքից, որի հաղորդագրության մեջ նաև նշված է. «Զանգահարել է Հայաստանում բնակվող անձը և հայտնել, որ ինքը Ուզբեկստանի քաղաքացի է, 2000 թվականից բնակվում է Հայաստանում, անձնագրի վավերականության ժամկետը լրացել է 2004 թվականին և ցանկանում է տեղեկանալ ՀՀ քաղաքացու անձնագիր ստանալու ընթացակարգին:

Քաղաքացին նաև հայտնել է, որ Հայաստանում չկա Ուզբեկստանի դիվանագիտական ծառայություն, ուստի պետք է Մոսկվայում գործող ծառայության միջոցով դիմի նշված պետության վերադարձի վկայական ստանալու համար, այնտեղից ստանա նոր անձնագիր, որպեսզի դրանից հետո ՀՀ օրենսդրությամբ սահմանված ընթացակարգով դիմի Հայաստանի քաղաքացություն ստանալու նպատակով:

Զանգահարողը տեղեկացրել է նաև, որ ծնվել է Ուզբեկստանում, սակայն ծննդյան վկայականը կորցրել է:
Հաշվի առնելով, որ Հայաստանի քաղաքացիություն ստանալու դիմում ներկայացնելիս պարտադիր ներկայացվող փաստաթղթերի ցանկում ներառված է նաև ծննդյան վկայականը՝ զանգահարողին պարզաբանվել է, որ Ուզբեկստան վերադառնալու դեպքում անհրաժեշտ է ստանալ նաև ծննդյան վկայական:
Հիշեցնենք, որ նախորդ հաղորդումներից մեկի ընթացքում զանգահարել էր Մոսկվայում գտնվող Հայաստանի քաղաքացին և տեղեկացրել, որ երեխան 14 տարեկան է, ծնվել է Երևանում, սակայն ժամանակին չեն ստացել ծննդյան վկայական և առանց նշված փաստաթղթի տեղափոխվել են Մոսկվա: Անձնագրավորման նպատակով ծննդյան վկայականի բացակայությունը ներկայումս հանդիսանում է խոչընդոտ:

Կապ էր հաստատվել Քաղաքացիական կացության ակտերի գրանցման գործակալության աշխատակցի և Մոսկվայում Հայաստանի հյուպատոսի հետ: Նրանց կողմից պարզաբանվել էր գործող ընթացակարգը, որի հիման վրա քաղաքացուն տրվել էր պարզաբանում:

Այսօր զանգահարել էր քաղաքացին և տեղեկացրել, որ հյուպատոսը անձամբ ընդունել է իրեն և գործին տրվել է ընթացք: Համապատասխան ստուգումների արդյունքում քաղաքացու դիմումը կբավարարվի:

Անհրաժեշտ է նաև ավելացնել, որ մեկ անգամ չէ, երբ Արտաքին գործերի նախարարության, հյուպատոսական ծառայությունների և Քաղաքացիական կացության ակտերի գրանցման գործակալության միջև ՀՀ ոստիկանության Skype ծառայության միջոցով անմիջական կապի արդյունքում քաղաքացիների հարցերին տրվել են լուծումներ, որոնք այլ դեպքերում կարող էին ավելի երկար ժամանակ պահանջել:

Հաջորդ ուղիղ կապը տեղի կունենա նոյեմբերի 29-ին՝ Երեւանի ժամանակով ժամը 11-ից 13-ը:

ՀՀ ոստիկանության Skype-ի ի հասցեն' Armenian Police։

Հարցեր կարելի է ուղարկել նաև [email protected], [email protected] էլեկտրոնային հասցեներին»: