Մոսկվայում Այվազովսկու ցուցահանդեսը գերազանցել է Սերովի ցուցահանդեսի ռեկորդը

Մոսկվայի Տրետյակովյան պատկերասրահում աշխարհահռչակ ծովանկարիչ Հովհաննես Այվազովսկու նկարների ցուցահանդես շուրջ 600 հազար մարդ է այցելել, այցելուների թվով այն գերազանցել է ավելի վաղ այստեղ կազմակերպված Վալենտին Սերովի ցուցահանդեսի ռեկորդը: Այդ մասին հայտնել է թանգարանի մամուլի ծառայությունը:

«Այվազովսկու ցուցահանդեսի աշխատանքի առաջին օրերից պարզ դարձավ, որ դրա նկատմամբ հանրության հետաքրքրությունն ավելի մեծ է, քան Վալենտին Սերովի հաջող ցուցահանդեսի նկատմամբ»,-մամուլի ծառայության հաղորդագրությունից մեջբերում է արել ՏԱՍՍ գործակալությունը:

Ըստ թանգարանի տվյալների, ցուցահանդեսի աշխատանքի չորս ամսվա ընթացքում այստեղ այցելել է 598 հազար 832 մարդ այն դեպքում, երբ Վալենտին Սերովի ցուցահանդես էր եկել շուրջ 486 հազար հոգի:

Կազմակերպիչների խոսքով՝ արվեստասերների հոսքը կարգավորելու համար այցելության համակարգ էր մշակվել ըստ սեանսների, ինչպես նաեւ սահմանվել է տոմսերի նախնական վաճառք:

Մինչդեռ ցուցահանդեսի այցելուները հայտնել են, որ տոմսերի գնման սահմանափակումներից օգտվել են սպեկուլյանտները, որոնք դրանք վերավաճառել են բարձրացված գներով: Ինչպես նշել է «Կոմսոմոլսկայա պրավդա»-ի թղթակիցը, գները հասել էին մինչեւ 4000 ռուբլի (62 դոլար), ընդ որում՝ տոմսերի պաշտոնական գինը գրեթե տասն անգամ պակաս է եղել: