Հայաստանի պետական լեզուն հայերենն է, այդպես եղել է և հիմա առավել ևս պետք է լինի. Անահիտ Բախշյան

Ռուսաստանի արտաքին գործերի նախարարության պաշտոնյաներից մեկը օրերս հայտարարել էր նախկին ԽՍՀՄ երկրներում ռուսերենին օրենսդրորեն հատուկ կարգավիճակ տալու և այն երկրորդ պետական լեզու հռչակելու անհրաժեշտության մասին:

ԼՈՒՐԵՐ.com-ի թղթակցի հետ զրույցում Կրթության ազգային ինստիտուտի փոխտնօրեն Անահիտ Բախշյանը` խոսելով այդ հայտարարության մասին, ասաց, որ իր դիրքորոշումը միանշանակ է՝ Հայաստանի պետական լեզուն հայերենն է, այդպես եղել է և հիմա առավել ևս պետք է լինի:

Ինչ վերաբերում է երեկ ՀՀ կրթության և գիտության նախարար Լևոն Մկրտչյանի հայտարարությանը, որ մշակվում է ռուսաց լեզվի հայեցակարգ, որի համաձայն՝ ռուսաց լեզվի նկատմամբ հատուկ դիրքորոշում է լինելու, տիկին Բախշյանը նշեց.

«Երեկ նախարարը իր խոսքում ասաց, որ 1998 թվականին՝ իր ժամանակ էլ է ընդունվել ռուսաց լեզվի զարգացման հայեցակարգը, սակայն այս տարիների ընթացքում չի փոխվել ռուսաց լեզվի ոչ որակը, ոչ դասավանդման մակարդակը և ոչ էլ տիրապետման մակարդակը»,- ասաց Անահիտ Բախշյանը:

Ա. Բախշյանի կարծիքով՝ հայեցակարգով կրթության որակը չի փոխվի: Այն արտոնյալ վիճակը, որ ուզում են տալ ռուսերենին, որպեսզի գրականություն, պատմություն անցնեն այդ լեզվով, չպետք է վերաբերի միայն ռուսաց լեզվին, այլ ցանկացած օտար լեզվի դասավանդման որակը պետք է փոխվի, որ երիտասարդները, ապագա մասնագետները շուկայի համար լինեն մրցունակ. այսօր որևէ օտար լեզու չիմացող բարձրագույն կրթություն ունեցող մեկը շուկայի համար մրցունակ չէ:

«Կրթության որակը փոխելու համար պետք է ունենալ լավ մանկավարժներ, մասնագետներ, կրթության կազմակերպման և լեզվի դասավանդման նոր մեթոդներ»,- իր խոսքը եզրափակելով՝ ասաց Ա.Բախշյանը: