«Փաստ». Դալլաքյանը կղեկավարի «Երրորդ հանրապետություն» «կիսաանտեր» կուսակցությունը

«Փաստ» օրաթերթը գրում է.

Հոկտեմբերի 11–ին, երբ Վիկտոր Դալլաքյանը հայտարարեց, որ որոշում է կայացրել հրաժարվել Հայաստանի նախագահի աշխատակազմի ղեկավարի տեղակալի և Ազգային ժողովում նախագահի պաշտոնական ներկայացուցիչը լինելու պարտականություններից, ինչպես նաև ՀՀԿ–ից և հիմնելու է իր կուսակցությունը, միանգամից սկսվեցին խոսակցությունները, թե ում հետ է փորձելու քաղաքական «կարմիր գորգի» վրայով անցնել: ՀՀԿ–ի թրի տակով անցած Դալլաքյանը չնայած հայտարարեց, որ նախագահականում անցկացրած չորս երկար ու անվրդով տարիների ընթացքում այնքան էլ անգործ չի մնացել, այլ ինչ–որ քարեր է հավաքել, և հիմա արդեն եկել է նետելու ժամանակը: Այնուամենայնիվ հարցն այս պահին այն է, թե դրանք ինչ ծանրության քարեր են և ում դեմ են նետվելու:

Ի դեպ, խոսակցություններ էին պտտվում, թե 83 օրենքների հեղինակ Դալլաքյանը նոր՝ «Շրջադարձ» անվամբ կուսակցություն է հիմնելու, սակայն հետագայում պարզվեց, որ որոշել է ոչ թե շրջադարձային նշանակություն ունեցող կուսակցություն հիմնել, այլ՝ ԱԺ պատգամավոր Խաչատուր Քոքոբելյանի կողմից 2003 թ.–ին հիմնած, բայց այդպես էլ ոչ մեկին պետք չեկած ՝«Երրորդ Հանրապետություն» կուսակցության բախտը շրջադարձել: Եվ ահա՝ դեկտեմբերի 23–ին «Դաբլթրի Բայ Հիլթն Երևան Սիթի Սենթր» հյուրանոցում սպասվում է կուսակցության արտահերթ՝ 7–րդ համագումարը:

Համագումարի օրակարգում հինգ հարց կա՝ կուսակցության ծրագրի, կանոնադրության փոփոխություն, ընտրություններ, համագումարի բանաձևի ընդունում, այլ հարցեր:

«Փաստը» Վիկտոր Դալլաքյանից փորձեց ճշտել, թե արդյո՞ք Դալլաքյանն է ղեկավարելու կուսակցությունը:

– Ես առաջիկայում ասուլիս եմ անելու, ձեզ էլ տեղյակ կպահենք և ձեր բոլոր հարցերին կպատասխանեմ, լա՞վ:

– Բայց խնդրում եմ պատասխանեք՝ «Երրորդ Հանրապետություն» կուսակցությունն ե՞ք ղեկավարելու:

– Ասում եմ այո, բայց մի րոպե, հա՞: Ես հարցազրույց չեմ տալիս: Ես քաղաքավարի մարդ եմ, դուք ինձ զանգահարել եք, ինձ հարց եք տալիս, բայց ես ասում եմ ասուլիս եմ անելու, այդ ժամանակ կպատասխանեմ ձեր բոլոր հարցերին:

Շարունակությունը' «Փաստ» օրաթերթի այսօրվա համարում: