Էդվարդ Նալբանդյանը հանդիպել է Մադագասկարի արտգործնախարարին

Ֆրանկոֆոնիայի միջազգային կազմակերպության արտգործնախարարների համաժողովին մասնակցող Հայաստանի ԱԳ նախարար Էդվարդ Նալբանդյանը նոյեմբերի 24-ին Անտանանարիվուում հանդիպեց ՖՄԿ ԱԳ նախարարների խորհրդի նախագահ, Մադագասկարի արտգործնախարար Բեատրիս Աթալլային: Այս մասին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից:

Նախարար Աթալլան, ողջունելով Հայաստանի արտգործնախարարին, նշեց, որ ջերմությամբ է հիշում նախորդ տարի Երևանում բարձր մակարդակով կազմակերպված Ֆրանկոֆոնիայի նախարարական համաժողովը ու դրա շրջանակներում ունեցած հանդիպումը: Նա խորհրդանշական համարեց, որ հենց Երևանում է Սենեգալից Մադագասկարին փոխանցվել ՖՄԿ նախարարական համաժողովի նախագահությունը։

Զրուցակիցները, կարևորելով երկու պետությունների միջև համագործակցության զարգացմանն ուղղված ջանքերը, ընդգծեցին դրանում Ֆրանկոֆոնիայի միջազգային կազմակերպության դերը՝ կամրջելու տարբեր մայրցամաքների և մշակույթների ժողովուրդներին:

Կողմերը քննարկեցին երկկողմ հարաբերությունների զարգացմանն առնչվող հարցեր: Շեշտվեց փոխգործակցության սերտացման գործում առկա մեծ ներուժը: Հայաստանի և Մադագասկարի արտաքին քաղաքական գերատեսչությունների ղեկավարները քննարկեցին կրթության, մշակույթի ոլորտներում համագործակցության հեռանկարները: Պայմանավորվածություն ձեռք բերվեց ակտիվացնելու երկու արտգործնախարարությունների միջև խորհրդատվությունները:

Էդվարդ Նալբանդյանը և Բեատրիս Աթալլան քննարկեցին Ֆրանկոֆոնիայի նախարարական համաժողովի, ինչպես նաև գագաթաժողովի օրակարգային հարցեր: Զրուցակիցներն արժևորեցին միջազգային հարաբերություններում ՖՄԿ դերակատարության մեծացմանն ու հեղինակության բարձացմանն ուղղված՝ կազմակերպության գլխավոր քարտուղարի ջանքերը:

Նախարարներ Նալբանդյանը և Աթալլան մտքեր փոխանակեցին տարածաշրջանային և միջազգային հարցերի շուրջ: