Հանրապետականների վախը. «Կարեն Կարապետյանին պարտադրեցին մտնել ՀՀԿ»

Այսօր կառավարության նիստում վարչապետ Կարեն Կարապետյանը հայտարարեց Հանրապետական կուսակցությանն անդամագրվելու որոշման մասին՝ կարծիք հայտնելով, որ այս քայլը շատերի համար կանխատեսելի է և տրամաբանական:

Ըստ Կարապետյանի, ՀՀԿ-ն այն կուսակցությունն է, որը գիտակցելով երկրի անվտանգության և զարգացման համար իր պատասխանատվությունը՝ որոշում է կայացրել փոխվել և ունի իր մեջ այդ ներուժը:

ԼՈՒՐԵՐ.com-ը զրուցեց «Ժողովրդական հայրենիք» կուսակցության ղեկավար Պետրոս Մակեյանի հետ, ով նշեց, որ հիմնականում ձեռնպահ է մնում նոր, «այսպես կոչված մենեջերների կառավարությանը» գնահատականներ տալուց, որովհետև հասկանում է, որ բոլորն աճպարարություն են անում:

«Հանրապետականները ձգտում էին, որ Կարեն Կարապետյանը հանրապետական դառնա, որպեսզի դառնա իրենցից մեկը: Հանրապետականն այսօր, մեղմ ասած, շատ բացասական ձևով է ընդունվում հանրության կողմից: Կարեն Կարապետյանի իմիջը, թեկուզ արհեստական, բայց բարձրացել էր, և հանրապետականները դրանից վախեցան, վախեցան, որ նա ինքնուրույն գործընթացներ կտանի: Կարծում եմ՝ նրան պարտադրեցին մտնել ՀՀԿ և դառնալ իրենցից մեկը: Իսկ մնացածը՝ կարծում եմ՝ կյանքը ցույց կտա. նա կդառնա՞ նրանցից մեկը, թե՞ կփորձի տարանջատվել ընթացքում:

Գ. Հ.