Ձմռան օձերն անշարժ են, բայց... որն է Երևանի կենտրոնում օձի հայտնաբերման պատճառը

Հայաստանում օձերի հայտնաբերման ահազանգերն այս տարի մոտ 130-ով պակաս են նախորդ տարվա համեմատ: ՀՀ արտակարգ իրավիճակների նախարարության ճգնաժամային կառավարման ազգային կենտրոնի պետի տեղակալ, փրկարար ծառայության փոխգնդապետ Արսեն Մկրտչյանի խոսքով՝ 2015 թվականին օձի հայտնաբերման 670 դեպք է գրանցվել, 2016-ին' 537: «Օձերի հետ կապված ահազանգերը հիմնականում ստացվել են ամռան ամիսներին: Նախորդ տարի սեպտեմբեր, հոկտեմբեր եւ նոյեմբեր ամիսներին ստացվել է օձի հայտնաբերման 167 ահազանգ: 2016 թվականի նույն եռամսյակում ահազանգերի թիվը կազմել է 117»,-ասաց նա:

Մկրտչյանի խոսքով' օձի խայթոցից նախորդ տարի սեպտեմբեր, հոկտեմբեր ամիսներին տուժել է 19 մարդ, այս տարի' 14: Նոյեմբերին տուժողներ չեն գրանցվել: «2015 թվականին օձի խայթոցի հետեւանքով մահացել է 2 քաղաքացի: Այս տարի, բարեբախտաբար, զոհեր չունենք, միայն տուժածներ են»,-ասաց Մկրտչյանը, հավելելով, որ մարդկանց մոտ օձերը հիմնականում վախ են առաջացնում եւ մարդիկ, օրինակ, լորտուից վախենում են նույն կերպ, ինչպես կվախենային գյուրզա տեսակի օձից:

Մեր այն հարցին, թե օձերը հայտնաբերվելուց հետո որտեղ են տեխափոխվում, ԱԻՆ ճգնաժամային կառավարման ազգային կենտրոնի պետի տեղակալը նշեց, որ թունավոր օձերը հիմնականում տեղափոխվում են Երեւանի կենդանաբանական այգի, իսկ ոչ թունավորները' բնակավայրերից հեռու բաց են թողնվում:

Կենդանաբանական այգու ակվատեռարիումի բաժնի վարիչ, սողունաբան Կարեն Մարտիրոյանը բացառեց այս եղանակին մայրաքաղաքում օձերի ակտիվությունը: «Արեւի հետ, օձերի որոշ տեսակներ կարող են դուրս գալ ձմեռանոցներից: Օձերը ձմռանը հիմնականում պատսպարվում են արվարձաններում»,-ասաց նա:

Անդրադառնալով Երեւան քաղաքի Ալեք Մանուկյան փողոցում կայանված մեքենայի վրայից հայտնաբերված օձին, սողոնուբանը չբացառեց, որ օձը կարող է մեքենայի մեջ մտած լինել շրջաններից որեւէ մեկում կամ հնարավոր է դա լինի ինչ-որ մեկի պահած օձը, որը փախել է: «Քանի որ օձերի մարմնի ջերմաստիճանը կախված է շրջակա միջավայրի ջերմաստիճանից, այս եղանակին օձերը գրեթե անշարժ են, սակայն վտանգը միեւնույնն է տարվա բոլոր եղանակներին»,-հավելեց նա:

Հայաստանում ապրում է 24 տեսակի օձ, որոնցից թունավոր են համարվում 4-ը: