Ինչո՞ւ ՀՎԿ-ն նախաձեռնեց ավանդների վերադարձի երկրորդ փուլը. Էդգար Առաքելյան

Հաշվի առնելով հանգամանքը, որ «Հայկական վերածնունդ» կուսակցության կողմից նախաձեռնված՝ ավանդների վերադարձման երկրորդ փուլի գործընթացը, որոշ անհատների ու խմբերի կողմից անհարկի շահարկվում է, ուստի պարզաբանում եմ, որ, ինչպես գիտեք, «Հայկական վերածնունդ» կուսակցության նախագահ Արթուր Բաղդասարյանի նախաձեռնությամբ դեռևս 2006 թվականից Հայաստանում սկսվեց նախկին խնայդրամարկղերում դրված ավանդների վերադարձման գործընթացը, որի արդյունքում, արդեն այսօր, տասնյակ հազարավոր մեր հայրենակիցները ստացել են ավանդների փոխհատուցում:

Ելնելով այն հանգամանքից, որ ավանդների վերադարձման գործընթացը արդեն 2017 թվականին մոտենում է ավարտական փուլին և նկատի ունենալով փաստը, որ այս ընթացքում, օբեկտիվ և սուբեկտիվ պատճառներով, ոչ բոլոր ավանդատուներն են ստացել իրենց ներդրած ավանդները, ուստի «Հայկական վերածնունդ » կուսակցությունը նախաձեռնել է ավանդների վերադարձման գործընթացի երկրորդ փուլը՝ ինչը իրականացնելու համար առաջիկայում հանդես կգա օրենսդրական նախաձեռնությամբ և որի մասին օրեր առաջ հայտարարեց նաև կուսակցության նախագահ Արթուր Բաղդասարյանը:

Այս գործընթացը սկսելու համար անհրաժեշտ օրենքի նախագծում դեռևս ավանդները չստացած բոլոր շահառուների խնդիրները հաշվի առնելու (իսկ դրանք բազմաթիվ են՝ սկսած չպահպանված ավանդային գրքույկներից, մինչև ժառանգների փոխհատուցումը) և ամբողջական տեղեկատվություն ունենալու համար հայտարարվել էր, որ ավանդներ ունեցած և դեռևս փոխհատուցում չստացած քաղաքացիները կարող են մոտենալ ՀՎԿ մոտակա տարածքային գրասենյակ և ներկայացնել ավանդները չստանալու հետ կապված իրենց խնդիրները, ինչը որոշ շրջանակներ սկսել են անհարկի շահարկել:

Հիշեցնեմ, որ երբ ՀՎԿ նախագահ Արթուր Բաղդասարյանը տարիներ առաջ նախաձեռնեց ավանդների վերադարձման գործընթացի առաջին փուլը, շատերը, նաև չարակամորեն, թերահավատորեն վերաբերվեցին՝ փորձելով նաև նախընտրական ու այլ ենթատեքստեր գտնել ու շահարկել, սակայն ժամանակը ցույց տվեց , որ նմանատիպ չարախոսները սխալ դուրս եկան, իսկ արդեն այսօր, գործընթացի մեկնարկից ուղիղ տասը տարի անց կարող ենք թվերի լեզվով փաստել, որ մեր տասնյակ հազարավոր քաղաքացիներին տրված ավանդների փոխհատուցման գործընթացն, ընդհանուր առմամբ, հաջող ընթացք է ունեցել, իսկ քաղաքացիներին տրամադրված գումարի չափը մի քանի տասնյակ միլիոն դոլարի է հասնում: Ինչպես նախկինում, այսօր էլ՝ նույն չարախոսներին ասում ենք, որ ավանդների վերադարձման երկրորդ փուլն էլ, ի հեճուկս իրենց, հասցնելու ենք ավարտին:

ՀՎԿ լրատվական-քարոզչական մասի ղեկավար
Էդգար Առաքելյան