Հայաստանում քի՞չ մարդ կա, շատերն են այսօր ցանկություն հայտնում ընդգրկվել ՀՀԿ-ում. Տարոն Մարգարյան

ՀՀԿ-ն իր գաղափարախոսությամբ պահպանողական կուսակցություն է: ՀՀԿ համագումարից առաջ լրագրողների հետ զրույցում ասաց ՀՀԿ կուսակցության անդամ, Երևանի քաղաքապետ Տարոն Մարգարյանն, ով համոզված է, որ հենց սա է մարդկանց գրավում, որ անդամակցում են կուսակցությանը:

Դիտարկումը, որ նոր անդամակցություններով կուսակցության ղեկավարն ուզում է փրկել կուսակցության դեմքը, քանի որ ՀՀԿ-ն շատ վարկաբեկված է, քաղաքապետը չհամաձայնեց, նշելով՝ «տարին տասներկու ամիս, երեք հարյուր վաթսունհինգ օր ՀՀԿ-ն նոր կուսակցական անդամներ է ունենում, հետևաբար կարելի է ասել, որ դա այդպես չէ»:

«Մենք շատ ուրախ և հպարտ ենք, որ մեր շարքերը համալրվում են նոր մարդկանցով: Մանավանդ ուրախ ենք, որ վերջին շրջանում նման ցանկություն հայտնեց ՀՀ վարչապետ Կարեն Կարապետյանը: Մենք նրան շնորհակալ ենք և շատ ուրախ, որ նաև ևս մեր թիմի անդամ է»,- ասաց նա:

Մարգարյանն ընդգծեց՝ վարչապետ Կարեն Կարապետյանն ունի շատ բարձր վարկանիշ և հեղինակություն, ով իր կամքով է ցանկություն հայտնել ընդգրկվել ՀՀԿ-ում: Հարցադրմանը՝ մեկ օրվա մեջ յոթ հազար մարդ որտեղի՞ց հայտնվեց ու ցանկություն հայտնեց անդամակցել ՀՀԿ-ին, Մարգարյանը պատասխանեց. «Ձեր կարծիքով Հայաստանում քի՞չ մարդ կա: Շատերն են այսօր ցանկություն հայտնում ընդգրկվել ՀՀԿ-ում»:

Հակադարձմանը՝ ինքը ևս մեկ օրվա մեջ է այդպիսի որոշում կայացրել, քաղաքապետը նշեց՝ եթե իր կենսագրությանը լավ ծանոթ լինեին, ապա կիմանային, որ ՀՀԿ-ին նա անդամակցում է դեռ պատանեկան տարիքից: «ՀՀԿ կանոնադրությունը թույլ է տալիս կուսակցական դառնալ 18 տարեկանից և ես նախ դարձել եմ շարքային կուսակցական, այնուհետև տարածքայինի ղեկավար, ապա նաև խորհրդի անդամ, իսկ հետո ԳՄ անդամ»,- ասաց նա:

Իսկ թե որ գաղափարախոսությունն է Տարոն Մարգարյանին հոգեհարազատ, քաղաքապետը պատասխանեց՝ բոլոր:

Արմինե Եփրեմյան